Ózbekstan azamatynan para alǵan pavlodarlyq polıtseı 2,5 mln teńge aıyppul tóleıdi
PAVLODAR. KAZINFORM – Kóshi-qon qyzmetiniń ınspektory sheteldik azamattyń elde bolý zańnamasyn buzǵanyn bile tura, kóz juma qarap kelgen. Ol bul "qorǵanshylyq" áreketi úshin 50 myń teńge para alǵan.
Belgili bolǵandaı, Ózbekstan azamaty 2023 jyldyń aqpan aıyna deıin zańdy túrde Pavlodar oblysy Aqsý qalasynda turyp, jergilikti saýda úıinde jumys istegen.
Biraq odan soń qujattarynyń merzimin uzartpaǵan.
Al jergilikti kóshi-qon qyzmetiniń ınspektory, polıtsııa maıory onyń bul zańsyzdyǵyn jasyryp qalý úshin 50 myń teńge para talap etken.
«Kóshi-qon qyzmetkeri sheteldik azamattyń zań buzýyna oraı Ákimshilik quqyq buzýshylyq kodeksiniń 517-baby, 4-tarmaǵy boıynsha ákimshilik shara qoldanýy tıis edi. Alaıda ol onyń áreketin qoldap, zańsyzdyqqa barǵan. 2023 jyldyń maýsym aıynda ınspektor Ózbekstan azamatynan 50 myń teńge para alǵan jáne onyń el aýmaǵynda birneshe aı zańsyz júrýine jaǵdaı týdyrǵan» dep habarlady Aqsý qalalyq sotynan.
Polıtsııa maıorynyń «qamqorlyq» áreketi ótken jyldyń qazan aıynda áshkere bolǵan.
Sotta 44 jasar polıtsııa qyzmetkeri óziniń kinásin tolyq moıyndap, bas bostandyǵynan aıyrmaýdy surady.
Sot sheshimimen oǵan 2,5 mln teńge aıyppul salyndy.
