Ózbekstan áıelderi bala ornyna qýyrshaq orap alyp, qaıyr surap kelgen (FOTO)
ALMATY. QazAqparat - Almatyda Ózbekstannan kelgen eki azamatsha bala ornyna qýyrshaq orap, alyp qaıyr surap kelgen. Bul jaıly 7-17 qyrkúıek arasynda ótken aptalyq barysynda qalalyq polıtseıler anyqtady.
Úsh kelinshek Medeý aýdanynyń adam kóp shoǵyrlanǵan jerlerinde kásip etken. Olardyń bireýinde ǵana qundaqtaýly sábı bolsa, qalǵan ekeýiniń qolynda qýyrshaq ekendigi belgili boldy.
«Balaǵa uqsas bolsyn dep jórgekke maqta, mata toltyryp alǵan. Olar osylaısha ońaı oljaǵa kenelmek bolǵan. Sońynan belgili bolǵandaı, olar Qazaqstannyń kóshi-qon týraly zańyn buzyp kelgen. Ustalǵandardyń qolynda jeke basyn kýálandyratyn qujat joq bolyp shyqty. Olar tólqujattarynyń tirkeýde ekendigine sendirip baǵýǵa tyrysty. Aqparat rastalmaı shyqty. Sot sheshimimen olar ákimshilik jazaǵa tartylyp, elden alastatylady», - dedi Medeý aýdandyq ІІB basshysy Erlan Oralbekov.
Onyń aıtýynsha, qoldanystaǵy zańnamaǵa sáıkes QR ÁQK 449-baby boıynsha osyndaı áreket jasaǵany úshin sheteldik azamattar 5 táýlikke qamalyp, keıin elden alastatylady.
