Ózbekstan aýrýhanasynda jarylys bolyp, 18 bala zardap shekti
ASTANA. QazAqparat - Ózbekstannyń Ándijan qalasyndaǵy aýrýhanada jarylys bolyp, saldarynan 18 oqýshy bala men 4 muǵalim zardap shekti. Bul týraly atalmysh eldiń Tótenshe jaǵdaılar mınıstrliginiń resmı saıtynda habarlandy.
«26 aqpan kúni saǵat 10.30 shamasynda Ándijan qalalyq medıtsınalyq birlestiginiń janyndaǵy Ortalyq emhananyń qazandyq bólmesinde jylytý qazany jaryldy. Aldyn ala málimet boıynsha, apatqa qazandyq qurylǵysynyń aqaýy sebep bolǵan», - delingen TJM habarlamasynda.
Oqıǵa saldarynan qazandyq bólmesine jaqyn ornalasqan flıýorografııa kabınetinde jyl saıynǵy tekseristen ótip jatqan mektep oqýshylary zardap shekti. Toǵyzynshy synypta oqıtyn 18 oqýshy men olarǵa ilesip kelgen 4 muǵalim jeńil jaraqattar alǵan.
«Qazir olardyń jaǵdaıy qanaǵattanarlyq. Eki oqýshyǵa shuǵyl kómek qajet boldy, olardyń da jaǵdaıy qanaǵattanarlyq. Ándijan qalasy hokımııatynyń jáne tótenshe jaǵdaılar, ishki ister, densaýlyq saqtaý, halyqtyq bilim berý jónindegi oblystyq basqarmalardyń basshylary, sondaı-aq «Ýztransgaz» AQ mamandary engen komıssııa quryldy. Olar oqıǵanyń sebebin anyqtap, zardap shekkenderge kómek kórsetý máselelerin qaraıtyn bolady», - delingen aqparatta.
Foto repost.uz
