Ózbekstan altyn medaldar sanyn 5-ke jetkizdi

PARIJ. KAZINFORM — Frantsııa astanasy Parıj qalasynda ótip jatqan Olımpıada oıyndarynda Ózbekstan quramasy altyn medaldar sanyn 5-ke jetkizdi.

Búgin ózbekstandyq boksshylar Asahýdja Mýıdınhýjaev (71 kg) pen Lazızbek Mýllajonov (-92 kg) Parıj Olımpıadasyndasynyń chempıony atandy. Osylaısha fınalǵa shyqqan ózbektiń bes boksshysynyń úsheýi altyn medalǵa qol jetkizip úlgerdi. Endi taǵy eki boksshy fınalda judyryqtasady.

Atap aıtsaq, Asahýdja Mýıdınhýjaev fınalda meksıkalyq boksshy Marko Alonso Verde Alvaresti 5:0 esebimen utty. Al 92 kelige deıingi salmaqta Lazızbek Mýllajonov Ázirbaıjan boksshysy Loren Berto Alfonso Domıngespen judyryqtasyp, ol da qarsylasyn 5:0 esebimen utyp, Olımpıada chempıony atandy.

Osylaısha Parıj Olımpıadasynda Ózbekstan quramasy búgin besinshi altyn júldelerine qol jetkizdi. Altyn medalǵa boksshylardan bólek, dzıýdoshy Dıera Keldıerova men taekvondoshy Ýlýgbek Rashıdov ıe boldy. Al boksshylardan ózbekter quramasyna alǵashqy altyndy Hasanboı Dýsmatov alyp bergen bolatyn.

Endi, 10 tamyzda Ózbekstannyń taǵy eki boksshysy Olımpıada altynyn sarapqa salady. Olar — 57 keli salmaqta Abdýmalık Halokov pen asa aýyr salmaqtaǵy Bahodır Jalolov.