Ózbekstan alǵashqy qashyqtyqtan zondtaý spýtnıgin ushyrdy
ASTANA. KAZINFORM – Ózbekstan «Samarkand-2028» qashyqtyqtan zondtaý gıperspektrlik spýtnıgin sátti ushyrdy, dep habarlaıdy Kazinform.
Jer serigi Qytaıdyń Shandýn provıntsııasynyń jaǵalaýyndaǵy teńizdegi ushyrý platformasynan ushyryldy.
Apparat qytaılyq Star.Vision kompanııasymen birlesip jasalǵan.
Joba aıasynda jer seriginiń borttyq júıesi úshin gıperspektrlik derekterdi orbıtada tikeleı óńdeýge múmkindik beretin arnaıy jasandy ıntellekt modýli jasaldy. Bul derekterdi berýdiń jáne keıingi taldaýdyń tıimdiligin arttyrady.
Spýtnıkten alynǵan derekterdi agrarlyq sektor, ekologııalyq monıtorıng, sý resýrstaryn basqarý, tótenshe jaǵdaılardy boljaý jáne qalalyq ınfraqurylymdy josparlaý sııaqty negizgi salalardy damytý úshin paıdalaný josparlanyp otyr.
«Samarkand-2028» - Ózbekstannyń iri halyqaralyq ǵarysh jobalarynyń biri, ol sonymen qatar Qytaımen ǵylymı-tehnıkalyq yntymaqtastyqty nyǵaıtýǵa yqpal etedi.
