Ózbekstan aldaǵy jyly shetelden 7 mln týrıst tartýdy josparlap otyr

TAShKENT. QazAqparat – Ózbekstan Respýblıkasynyń Prezıdenti Shavkat Mırzıeev týrızm salasyn damytý jónindegi keńes barysynda keminde 7 mln sheteldik jáne 12 mln ishki týrısti tartýdy tapsyrdy, dep habarlaıdy QazAqparattyń menshikti tilshisi Ózbekstan Prezıdentiniń baspasóz qyzmetine silteme jasap.

«Týrızm pandemııadan keıin bıyl qalpyna kelip jatyr. Osy jyly qyrkúıekte elimizge kelgen sheteldik týrıster sany 2021 jylmen salystyrǵanda úsh esege artty. Jyl basynan beri týrıstik eksport kólemi 926 mln dollardy qurady. Elimizde sheteldik týrıster orta eseppen 4-5 kún bolyp, sol ýaqyt ishinde shamamen 305 dollar kóleminde aqsha jumsaıdy», - dedi Prezıdent.

Ózbekstan Prezıdenti Samarqandta qurylǵan «Uly Jibek joly» halyqaralyq týrızm ortalyǵynyń áleýeti joǵary ekenin atap ótti. Ol jylyna 2 mıllıon týrıstke qyzmet kórsete alady. Ferǵana oblysynda 5 aýdan men 3 qalany qamtıtyn «Altyn alqap» týrıstik jelisin qurý jobasy oń baǵalandy. Sondaı-aq, safarı jáne qajylyq týrızmdi damytý múmkindikteri de atap ótildi.

«Bizdiń elimizde 1,2 myńnan astam ǵıbadathana bar. Osy múmkindikti tolyq paıdalana otyryp, jylyna keminde 1 mln týrıst tartýǵa bolady», - dedi Shavkat Mırzıeev.

Sonymen qatar Prezıdent týrısterdi ishki ister organdarynda tirkeý erejelerin jeńildetý máselesine nazar aýdardy. Ol ár týrıst úshin kúresip jatqan jaǵdaıda, artyq shekteýlerdi qaıta qaraý kerek ekenin atap ótti.

«Týrısterdi ishki ister organdaryna tirkeý tártibinde qolaısyzdyqtar bar. Atap aıtqanda, sheteldik týrıst qonaqúıde 2 kún, al týystarynda 3 kún turý kerek. Іshki ister mınıstrliginiń aldyndy bul júıeni taldaý jáne shamadan tys shekteýlerdi joıý mindeti tur. Sheteldik týrısterdi ýaqytsha tirkeýdiń ornyna onlaın-habarlama paıdalanylatyn bolady», - dedi Sh. Mırzıeev.

Sondaı-aq, habarlama tártibin engize otyryp, týrıstik agentterdiń qyzmetin lıtsenzııalaý talabyn alyp tastaý josparlanýda. Bul myńdaǵan týrıstik agentterdiń paıda bolýyna múmkindik beredi.

Keńes qorytyndysy boıynsha Ózbekstan Prezıdenti jumystyń naqty baǵyttaryn belgilep, olardy iske asyrýǵa jaýaptylardy anyqtady.

«Jalpy, kelesi jyly 7 mln sheteldik jáne 12 mln ishki týrısterdi tartý múmkindigi bar. Sol arqyly týrıstik qyzmetterdiń eksportyn 2 mlrd dollarǵa deıin arttyrýǵa bolady», - dep túıindedi Shavkat Mırzıeev.

Buǵan deıin Ózbekstan aldaǵy bes jylda týrıster sanyn 9 mln adamǵa deıin jetkizýdi kózdep otyrǵany týraly habarlanǵan bolatyn.

Mádıbek Jánibekov

Foto: president.uz