Ózbekstan Aqtóbede órtengen avtobýs qurbandaryn alyp ketýge arnaıy ushaq jiberdi
ASTANA. QazAqparat - Qazaqstanda órtengen avtobýsta qaza tapqan Ózbekstan azamattaryn alyp ketý úshin Tashkentten arnaıy reıs ushyryldy, dep habarlaıdy «QazAqparat» HAA tilshisi ÓR TJM-ne silteme jasap.
«Ushaq Tashkent ýaqytymen 15:00-de ushty. Ázirshe qaza tapqandar esimderiniń tolyq tizimi joq. Bul másele qazir Qazaqstan ІІM jáne SІM-men birlese sheshilýde. Avtobýs Saryaǵash qalasynan Samaraǵa bara jatqan», - delingen habarlamada.
Sonymen qatar Ózbekstan TJM baspasóz qyzmetindegiler olarda jol apatynda aman qalǵandar tizimi de joq ekenin aıtty.
«Biz ázirshe aman qalǵandar tizimin alǵan joqpyz. Osy málimetti anyqtap jatyrmyz», - deıdi baspasóz qyzmetindegiler.
Eske salaıyq, tótenshe jaǵdaı Aqtóbeden 320 shaqyrym qashyqtyqta Qalybaı kentinen 10 shaqyrym jerde «Samara-Shymkent» tasjolynda bolǵan.
Jedel shtabta belgili bolǵandaı, avtobýs jolaýshylary Ózbekstannan Reseıge kúnkóris qamymen bara jatqan. Onda Ózbekstannyń 54 azamaty men 3 qazaqstandyq bolǵan. Avtobýsta shyqqan órt saldarynan 52 ózbekstandyq qaza tapty. Tiri qalǵandardyń arasynda 3 qazaqstandyq jáne 2 ózbekstandyq bar. Olardy jeńil deńgeıde kúıik shalǵan. Oqıǵanyń mán-jaıy tergeý amaldary barysynda anyqtalmaq. Osy oqıǵaǵa baılanysty arnaýly Úkimettik komıssııa jasaqtaldy.
