Ózbekstan Afrıka elderimen vızasyz rejım engizý múmkindigin talqylap jatyr
TAShKENT. KAZINFORM — Ózbek tarapy Efıopııanyń Syrtqy ister mınıstri Hadera Aberamen jáne Ońtústik Afrıka Respýblıkasynyń syrtqy saıası vedomstvosy ókilderimen kezdesý ótkizdi, dep habarlaıdy Kazinform agenttiginiń Tashkenttegi menshikti tilshisi.
Dunyo aqparat agenttiginiń habarlaýynsha, kelissóz barysynda taraptar Ózbekstan azamattary úshin vızasyz rejım engizý múmkindikterin talqylady. Sonymen qatar eki el azamattarynyń ózara saparlaryna qolaıly jaǵdaı jasaý máselesine de erekshe nazar aýdaryldy.
Kezdesý qorytyndysy boıynsha taraptar vızalyq rásimderdi jeńildete otyryp, saýda-ekonomıkalyq jáne mádenı-gýmanıtarlyq salalardaǵy yntymaqtastyqty jandandyrýǵa ýaǵdalasty.
Eske salaıyq, 2030 jylǵa qaraı ózbekstandyqtar álemniń 50 eline vızasyz saparlaı alady.
Sondaı-aq, Eýroodaq pen Ózbekstan vızalyq rejımdi jeńildetý máselesin talqylap jatyr.
