Ózbekstan AES-ke qajetti salqyndatý júıesin Majarstannan alady
TAShKENT. KAZINFORM — Uzatom agenttigi men Majarstannyń «MVM EGI» memlekettik kásiporny atom energetıkasy salasyndaǵy yntymaqtastyq kelisimine qol qoıdy, dep habarlaıdy Kazinform agenttiginiń menshikti tilshisi.
Qujatqa sáıkes, «MVM EGI» kásiporyny Ózbekstanda boı kóteretin atom elektr stantsııasyna qajetti qurǵaq salqyndatý júıesin qurastyryp, ony energetıkalyq nysanǵa beıimdep ornatady.
Buǵan qosa taraptar ǵylymı zertteý júrgizý, óndiristi Ózbekstan aýmaǵyna kóshirý jáne qajetti ınfraqurylym jasaqtaýǵa ýaǵdalasty. Resmı Tashkent pen Býdapesht AES-ke qajetti mamandardy birlesip oqytýǵa da nıetti.
Uzatom agenttiginiń dırektory Azım Ahmedhadjaevtyń sózinshe, Majarstan qurǵaq salqyndatý júıesin qurastyrýdy 2026 jyly bastaıdy.
Eske salaıyq, buǵan deıin Ózbekstan bıligi iri AES salý múmkindigin qarastyryp jatqanyn jazǵan edik.
Sonymen qatar qazirgi ýaqytta resmı Tashkent az qýatty AES salýǵa kiristi. Árqaısysynyń qýaty 55 MVt bolatyn 6 reaktor (jalpy qýaty — 330 MVt) Djızak oblysyndaǵy Týzkan kólinde boı kóteredi. AES-tiń alǵashqy reaktory 2029 jyldyń sońynda iske qosylmaq. Al ol tolyq qýatta 2033 jyldan bastap jumys isteıdi dep josparlanǵan.
Jaqynda Kazinform agenttigine suhbat bergen Uzatom agenttiginiń dırektory Azım Ahmedhadjaev energetıkalyq nysannyń quny 2 mlrd dollardan aspaıtynyn aıtty.
Osyǵan saı, Ózbekstan men Reseı AES salý kelisimshartynyń kúshine ený hattamasyna qol qoıdy.
Sondaı-aq AES salý úshin halyqaralyq konsortsıým qurylady.