Ózbekstan 43 mlrd dollar ınvestıtsııa tartýdy josparlap otyr

ASTANA. KAZINFORM — 2017 jyldan beri Ózbekstan ekonomıkasyna barlyq kózderden 188 mlrd dollar ınvestıtsııa tartyldy, onyń 87 mlrd dollary sheteldik ınvestıtsııa, dep habarlaıdy Kazinform tilshisi.

Ózbekstan basshysynyń baspasóz qyzmetiniń habarlaýynsha, 2024 jyly ekonomıkaǵa quıylǵan ınvestıtsııa kólemi 1,3 ese ósip, 36 mlrd dollardan asty. Sonyń arqasynda jyl basynan beri 560 iri jáne orta joba iske qosyldy. Onyń jalpy quny 70 trln sýmdy (shamamen 5,4 mlrd dollar) quraıdy.

— Kelesi jyly 43 mlrd dollar ınvestıtsııa quıý josparlanyp otyr, bul bizge 300-den astam iri jobany júzege asyrýǵa jáne ımportpen básekege túse alatyn 662 jańa ónim túrin shyǵarýǵa múmkindik beredi. Eksporttyq logıstıkalyq tizbekter kúrdelene túsýde, negizgi eksporttyq naryqta daıyn ónimge suranys azaıdy. Osyndaı jaǵdaıda ekonomıkanyń ósý qarqynyn jedeldetý úshin ishki resýrstardy tolyq jumyldyrý qajet. 2030 jylǵa qaraı jyl saıynǵy eksportty 45 mlrd dollarǵa deıin eki esege jetkizý maqsaty qoıylǵan, — delingen habarlamada.

Aıta keteıik, buǵan deıin Ózbekstan Senaty 2025 jylǵa arnalǵan bıýdjetti bekitken bolatyn. Shoǵyrlandyrylǵan bıýdjet kirisi 431 trln sýmdy (shamamen 33,4 mlrd dollar), shyǵystary 480,5 trln sýmdy (37,3 mlrd dollar) quraıdy dep boljandy.

Buǵan deıin Ózbekstanda 2025 jylǵy ınflıatsııa deńgeıine boljam jasaldy.