Ózbekstan 2030 jyly sheteldik týrıster sanyn 20 mıllıonǵa jetkizbek
ASTANA. KAZINFORM — 2030 jylǵa qaraı Ózbekstan týrızmniń JІÓ-degi úlesin 7%-ǵa deıin jetkizýdi, týrızm qyzmetteri eksportyn 8 mıllıard dollardan asyrýdy jáne joǵary deńgeıli qonaq úıler sanyn eki ese arttyrýdy josparlap otyr.
Bul týraly Ózbekstan prezıdenti Shavkat Mırzıeev málimdedi. Onyń aıtýynsha, týrızm ekonomıkanyń bolashaǵy zor salalarynyń birine aınalyp keledi.
2025 jyly elge shamamen 12 mıllıon sheteldik týrıst keldi. Bul 2016 jylmen salystyrǵanda alty ese kóp. Osy kezeńde týrızm qyzmetteri eksporty 11 ese ósip, 4,8 mıllıard dollarǵa jetken.
Mırzıeev eldiń týrızm ınfraqurylymyn damytýdy jáne zamanaýı baǵyttardy ashýdy kózdep otyrǵanyn atap ótti. Atap aıtqanda, Hıýada halyqaralyq týrıstik qalashyq, kongress ortalyǵy jáne tarıhı-etnografııalyq saıabaq qurý josparlanǵan.
Samarqantta Jibek joly murajaıyn salý jáne Qaraqalpaqstandaǵy arheologııalyq oryndarǵa jańa týrıstik baǵdarlardy iske qosý josparlanyp otyr.
Basymdyq berilgen baǵyttardyń qatarynda jasandy ıntellekt pen tsıfrlyq tehnologııalardy engizý, biryńǵaı ulttyq týrıstik platforma qurý, gastronomııalyq, ekologııalyq, qajylyq, medıtsınalyq, shytyrman oqıǵaly, iskerlik, etnıkalyq týrızmdi, sondaı-aq taý jáne aýyl týrızmin damytý bar.
Sonymen qatar Shavkat Mırzıeev «Ózbekstan Respýblıkasynyń týrızm salasyndaǵy eńbek sińirgen qyzmetkeri» qurmetti ataǵyn belgileýdi usyndy.
Eske sala keteıik, 2025 jyly Qazaqstanǵa Ózbekstannan 5 mln týrıst kelgenin habarlaǵan edik.
Ózbekstannyń týrıstik ortalyǵynda samokat tebýge shekteý qoıylady.
