Ózbekstan 2030 jylǵa qaraı jalpy ishki ónim kólemin $200 mlrd jetkizýdi josparlap otyr

TAShKENT. KAZINFORM – 2030 jylǵa qaraı Ózbekstan jalpy ishki ónim kólemin 200 mlrd dollarǵa jetkizýge nıetti. Buǵan deıingi meje 160 mlrd dollar shamasynda belgilengen edi, dep habarlaıdy Kazinform agenttiginiń Tashkenttegi menshikti tilshisi Álıhan Asqar.

Prezıdent Shavkat Mırzıeevtiń tóraǵalyǵymen ótken keńesten keıin O'zbekiston 24 telearnasyna suhbat bergen Ekonomıka jáne qarjy mınıstriniń birinshi orynbasary Ilhom Norkýlov ekonomıkalyq damýdyń jańartylǵan jospary týraly baıandady.

Onyń sózinshe, aldaǵy 5 jylda jan basyna shaqqandaǵy JІÓ 5 myń dollarǵa teńelýi tıis. Buǵan deıingi josparǵa saı, 2030 jylǵa qaraı eldiń JІÓ kólemi 160 mlrd dollarǵa jetip, onyń jan basyna shaqqandaǵy úlesi 4 myń dollar bolýy qajet edi.

«Prezıdent 2030 jylǵa qaraı JІÓ kólemin 200 mlrd dollarǵa, al onyń jan basyna shaqqandaǵy úlesin 5 myń dollardan asyryp túsirý mindetin esh qıyndyqsyz oryndaýǵa bolatynyn atap ótti. Bul el ekonomıkasynyń san turǵysynan ǵana emes, jalpy sapaly damıtynyn bildiredi», - dedi Ilhom Norkýlov.

Onyń aıtýynsha, keler jyly ınflıatsııany 7% deńgeıinde ustap turý mindeti qoıylǵan. Al 2026 jyly 5-6% kóleminde tejeý josparlansa, 2027 jyldan bastap 5% nemese odan az mólsherge tómendetý kózdelgen.

Aıta keteıik, túrli baǵalaý boıynsha byltyr Ózbekstannyń jalpy ishki ónim kólemi 100 mlrd dollardan asty.

Eske salaıyq, Ózbekstan aldaǵy 5 jylda jalpy ishki ónimdi 160 mlrd dollarǵa jetkizýdi josparlaǵan.

Qosa ketsek, Ózbekstanda kóleńkeli ekonomıkanyń JІÓ-degi úlesi 45 paıyzǵa deıin jetedi.