Ózbekstan 2028 jyly «Mirzo Ulug’bek» spýtnıgin ǵarysh keńistigine shyǵarady

TAShKENT. KAZINFORM — Ózbekstan ǵylymı zertteý júrgizýge arnalǵan «Mirzo Ulug’bek» tuńǵysh otandyq spýtnıgin 2028 jyly ǵarysh keńistigine shyǵarýdy josparlap otyr. Bul týraly prezıdent Shavkat Mırzıeevtiń tóraǵalyǵymen ótken keńeste málim boldy, dep habarlaıdy Kazinform agenttiginiń menshikti tilshisi. 

Keıingi 5 jylda Ózbekstanda Jerdi qashyqtyqtan zondtaý derekterine suranys 3 esege artqan. Búginde ǵarysh monıtorıngi júıesimen onnan astam memlekettik organ jumys isteıdi.

— Eń bastysy — ǵaryshtan alynǵan derekter arqyly biz jańa ekonomıkalyq múmkindikterdi anyqtap, olardy naqty tabys kózine aınaldyramyz. Bul memlekettik resýrstardy basqarý tetikteri men mádenıetiniń ózgerip jatqanyn aıǵaqtaıdy, — dedi Shavkat Mırzıeev.

Sonymen qatar, keńeste ǵylymı zertteý júrgizetin alǵashqy ulttyq jerserikti qurastyrý jobasy talqylandy. Tıisinshe, Ózbekstan prezıdentine atalǵan sala boıynsha mamandardy daıarlaý, ınjenerler tobyn jasaqtaý jáne 2028 jyly ǵaryshqa «Mirzo Ulug’bek» spýtnıgin ushyrý usynyldy.

Buǵan qosa, Shavkat Mırzıeev tuńǵysh ózbek ǵaryshkerin daıyndaý jáne ony ǵarysh keńistigine shyǵarý jumystaryna toqtalyp, munyń strategııalyq mindet ekenin atap ótti.

— Bul jaı ǵana sımvoldyq mánge ıe bastama emes, ol elimizdiń ǵylymı áleýetin arttyrýǵa baǵyttalǵan, — dedi Ózbekstan basshysy.

Jınalysta málim bolǵandaı, ǵaryshkerdiń sapar kestesi 10-14 kúnge josparlanǵan. Ol kosmosta medıtsına, bıologııa jáne ósimdik genetıkasy baǵyttarynda zertteý jumysyn júrgizýi tıis.

Eske salaıyq, buǵan deıin Ózbekstan kosmosqa óz ǵaryshkerin jiberý úshin daıyndyqqa kirisetinin jazyp edik.

Qosa ketsek, bıyl Ózbekstan men Qytaı ǵaryshqa Jerdi qashyqtyqtan zondtaıtyn spýtnık ushyrýdy josparlap otyr.