Ózbekstan 2027 jylǵa qaraı kartop ımportyna táýeldilikten arylýǵa nıetti

TAShKENT. KAZINFORM — 2027 jylǵa qaraı Ózbekstan ishki naryqty kartoppen tolyq qamtamasyz ete alýy tıis, dep habarlaıdy Kazinform agenttiginiń menshikti tilshisi.

Dıqandardy qoldaý máseleleri qaralǵan keńeste Ózbekstan prezıdenti Shavkat Mırzıeev jaýapty organdarǵa osyndaı tapsyrma berdi. Qazirgi tańda respýblıka qajettilikti ımport esebinen jaýyp otyr.

Ózbekstanda 290 myń gektarǵa kartop ósiriledi. Degenmen fermerler joǵary ónim ala almaı otyr. Osyǵan baılanysty Shavkat Mırzıeev jergilikti klımatqa beıimdelgen kartop surypyn shyǵarýdy tapsyrdy.

Keńes nátıjesinde belgili bolǵandaı, bıyl Aýyl sharýashylyǵyn qoldaý qory kartop alqaptaryn keńeıtý úshin 400 mlrd sým (shamamen $30,8 mln) qarajat bólýdi josparlap otyr. Sonymen qatar, ımporttalatyn tuqymdyq kartop kedendik bajdan 3 jylǵa bosatylady.

Eske salaıyq, byltyr 11 aıda Ózbekstan 52,6 mln dolarǵa 627 myń tonna kartop ımporttady. Resmı Tashkentke bul kókónistiń 74 paıyzyn Qazaqstan eksporttady. Sonymen qatar, Ózbekstan Qyrǵyzstan men Pákistannan kartop satyp aldy.

Buǵan deıin habarlaǵanymyzdaı, 28 qańtardan bastap Qazaqstannan ózge elderge kartop shyǵarýǵa tyıym salyndy.