Ózbekstan 2026 jyly Dúnıejúzilik saýda uıymyna qosylýy múmkin
TAShKENT. KAZINFORM — Ózbekstannyń Dúnıejúzilik saýda uıymyna (DSU) múshe bolýy týraly sheshim 2026 jyly maquldanýy yqtımal, dep habarlaıdy Kazinform agenttiginiń menshikti tilshisi.
Bul týraly Ózbekstan prezıdentiniń DSU máseleleri jónindegi arnaıy ókili Azızbek Ýrýnov málimdedi.
— Sheshim túpkilikti, 2026 jylǵa deıin de kóp ýaqyt qalmady, — dep jazdy A.Ýrýnov óziniń áleýmettik jelidegi resmı paraqshasynda.
Aıta keteıik, 18-19 aqpan aralyǵynda DSU Bas keńesiniń otyrysy ótti. Onyń barysynda keler jyly 26-29 naýryzda Kamerýnda ótetin sammıtke deıin Ózbekstan, Efıopııa, jáne Bosnııa-Gertsegovınanyń uıymǵa qosylýyn maquldaý usynysy kóterildi. Bastamaǵa qatysty DSU-nyń 26 múshesi sóz sóılep, onyń 16-sy resmı Tashkentke qoldaý bildirdi.
Eger Ózbekstan uıymnyń tolyq múshesi atansa, onda oǵan ýaqyt beriledi. Ol kezeńde memleket salyq saıasatyn DSU talaptaryna sáıkestendirýi kerek.
Buǵan deıin habarlaǵanymyzdaı, Ulybrıtanııa Ózbekstannyń DSU-ǵa qosylýy úshin tehnıkalyq kómek kórsetedi.
Eske salaıyq, taıaýda prezıdent Shavkat Mırzıeev Ózbekstannyń Dúnıejúzilik saýda uıymyna qosylý protsesi aıaqtalýǵa jaqyn ekenin málimdep edi.
Buǵan deıin DSU-ǵa qosylý boıynsha Ózbekstan AQSh jáne Qytaımen arada ótken kelissózderdi qorytyndylady.