Ózbekstan 2011 jyly 2,913 mıllıard dollar sheteldik ınvestıtsııany ıgerýdi josparlap otyr
TAShKENT. 10 qańtar. QazAqparat /Qurmat Samarhan/ - Ózbekstan Úkimeti 2011 jyldyń ınvestıtsııalyq baǵdarlamasynyń aıasynda 2,913 mıllıon AQSh dollary kólemindegi sheteldik ınvestıtsııalardy ıgerýdi josparlaýda, dep habarlaıdy ózbek basylymdary.
Resmı aqparat kóziniń habarlaýynsha, Ózbekstan Prezıdenti Islam Karımov 2010 jyldyń jeltoqsan aıynyń sońynda 113 ınvestıtsııalyq jobany qamtyǵan 2011 jyldyń ınvestıtsııalyq baǵdarlamasyn bekitti.
Atap aıtqanda, Ózbekstan Úkimettiń kepildemesi boıynsha berilgen sheteldik nesıelerdiń esebinen 42 joba boıynsha 801,2 mıllıon AQSh dollaryn jáne tikeleı sheteldik ınvestıtsııalardyń esebinen 71 joba boıynsha 2,112 mıllıard dollardy ıgermek.
Investıtsııalardyń qomaqty bóligi - 1,925 mıllıard AQSh dollary - otyn-energetıkalyq sektorynda ıgerilmek, onyń 1,845 mıllıardy tikeleı ınvestıtsııalar esebinen. Al geologııalyq barlaý jumystaryna sheteldik kompanııalar 2011 jyly 165,4 mıllıon dollar ınvestıtsııa salǵaly otyr. Ózbekstannyń toqyma ónerkásibin damytýǵa 116,9 mıllıon dollardyń tikeleı ınvestıtsııasyn tartý josparlansa, al uıaly baılanys operatorlary telekommýnıkatsııa salasynda 68 mıllıon dollar ınvestıtsııany ıgermek. Oǵan qosa, kólik sektorynda 162,3 mıllıon dollardyń sheteldik ınvestıtsııalaryn ıgerý josparlanyp otyr.
