Ózbek jolbarystary Astanaǵa kele jatyr
ASTANA. QazAqparat - 5 maýsym kúni elordada QR Prezıdenti kýbogy úshin bokstan halyqaralyq týrnır ashylady. Baıraqty báseke eýropalyq qurlyqtyq chempıonattyń ótetin merzimimen saı kelgendikten negizgi tartys Azııa boksshylarynyń arasynda ótpek. Bul jaıynda QR Boks federatsııasynyń baspasóz qyzmetinen málim etti, dep habarlaıdy QazAqparat.
Aıta keterligi, qazirgi ýaqytta Azııanyń bokstan ulttyq federatsııalary Astana tórinde sharshy alańǵa shyǵatyn óz komandalaryn jarııa etýde. Máselen, Ózbekstan Boks federatsııasy qyzdar boksynyń Olımpıada oıyndaryna kirgen úsh salmaq sanaty boıynsha sportshylarynyń tizimin usyndy. Atalǵan tizimge sáıkes 52 kelide Tursynaı Rahımova, 60 kelide Edgora Mırzaeva, 75 kelide Nafısa Asqarova ózbek eliniń namysyn qorǵamaq.
Al erler quramyndaǵy 10 boksshynyń 7-eýi Uzbek Tigers klýbynyń sapynda óner kórsetedi. Olardyń qatarynda Nadır Mırzahmedov (49 keli), 2015 jyly Gallada ótken týrnırdiń chempıony Abror Kadyrov (52), WSB serııasynda otandasymyz Іlııas Súleımenovpen judyryq túıistirgen Abdýlhaı Sharahmatov (56), Ýlýgbek Komılov (64), 2014 jyly Azııanyń qola medalin jeńip alǵan Fazlıddın Melıboev (69), Islamıada-2017 shırek fınalynda qazaqstandyq Tursynbaı Qulahmetke ese jibergen Mahmýd Gaıpov (75) jáne 2009 jylǵy jasóspirimder arasynda álem chempıony Mırzobek Hasanov bar. Munan bólek, QR Prezıdenti kýbogynda Ózbekstan atynan 2014 jylǵy jasóspirimder Olımpıadasynyń kúmis júldegeri Sýlaımon Latıpov (60), Kozım Mardanov (81) jáne Rýstam Ismaılov (91+) synǵa túsedi.
Búginde bul baıraqty básekege Qyrǵyzstan, Tájikstan, Ońtústik Koreıa, Úndistan, Reseı, Fılıppın, Ýkraına, Mońǵolııa jáne Irannyń boksshylary qatysatyndyǵy belgili. Al Qazaqstan atynan boksshylarymyz birneshe quramada jarys jolyna shyǵady. QR Prezıdenti kýbogy úshin ótetin tartysy kezdesýder 5 maýsym kúni «Dáýlet» sport kesheninde bastalady. Fınaldyq kezdesýler 10 maýsymǵa josparlanǵan.
