Ózbek jastary Abdýkodır Hýsanov sııaqty bolýdy armandaı bastady – sportshynyń jattyqtyrýshysy
TAShKENT. KAZINFORM – Buryn ózbekstandyq jastar Krıshtıaný Ronaldýǵa eliktese, qazir Abdýkodır Hýsanovtyń dárejesine jetýdi armandaı bastady. Kazinform agenttiginiń menshikti tilshisine eksklıýzıvti suhbat bergen 20 jastaǵy aıaqdopshynyń burynǵy jattyqtyrýshysy Alısher Ibragımov osylaı málim etti.
Fýtboldan Ózbekstan ulttyq quramasynyń oıynshysy Abdýkodır Hýsanov resmı túrde ataqty «Manchester Sıtı» komandasynyń jeıdesin kıdi. Ony premer-lıganyń 6 dúrkin chempıondary 40 mln eýroǵa frantsýzdyń «Lans» komandasynan satyp aldy. Bul - ózbek fýtboly úshin tarıhı oqıǵa.
Osy oraıda, Kazinform agenttiginiń Ózbekstandaǵy menshikti tilshisi Abdýkodır Hýsanovty 4 jylǵa jýyq baptaǵan jattyqtyrýshysy Alısher Ibragımovpen suhbat quryp, shákirtiniń jetistigi men jalpy kórshi el fýtbolynyń aıaq alysyn surap kórdi.
Alısher Ibragımov — talaı fýtbolshynyń babyn kelistirip, baǵyn ashqan tájirıbeli jattyqtyrýshy. Abdýkodır Hýsanov — solardyń biri. A.Ibragımovtiń sózinshe, aǵylshyn komandasy oıynshy tańdaýda qatelesken joq.
- 12 jasqa tolǵansha A.Hýsanovty marqum Akmal Rýshýllaev jattyqtyrdy. Ári qaraı ol ózinen eki jas úlken balalarmen dop teýip júrdi. Men «Býnedkor» komandasynda 2003 jylǵy jasóspirimdermen jumys istep júrgenmin. Sol kezeńde maǵan A.Rýshýllaev A.Hýsanovty ózime alýymdy ótindi, óıtkeni oǵan úlken toppen oınaý qıyn edi. Tıisinshe, men ony 4 jylǵa jýyq jattyqtyrdym, - dedi A.Ibragımov.
Búginde «Manchester Sıtıdiń» oıynshysy atanǵan Abdýkodır Hýsanovty 12-16 jas aralǵynda osy Alısher Ibragımov jattyqtyrǵan. Bapkerdiń aıtýynsha, ár fýtbolshynyń bolashaq baǵyty men negizin osy kezeńde qalyptastyryp úlgerý mańyzdy.
- Bolashaǵynan úlken úmit kúttiretin sportshy ekenin áýelden baıqadyq. Ol únemi negizgi quramda óner kórsetti. Qazan qalasynda ótken chempıonatta birinshi oryn aldyq. Shydamdy, eńbekqor, oılaý qabileti joǵary oıynshy. Fýtbolshynyń negizi 12-16 jas aralyǵynda qalyptasady. Sol kezeńde Abdýkodır Hýsanov meniń jetekishiligimmen jattyqty. Eger osy jas aralyǵynda aıaqdopshynyń daıyndyǵy men baǵyty qate tańdalsa, onda onyń bolashaqta úzdik oıynshy bolýy ekitalaı, - dedi bapker.
Abdýkodır Hýsanovty jeke tanıtyn taǵy bir jattyqtyrýshy, fýtbol agenti Davron Ergashev búgingi «Manchester Sıtı» oıynshysy bala kezinen óziniń kásibı sheberligin ushtaýǵa erekshe mán bergenin atap ótti.
- A.Hýsanovtyń minezi tuıyq bolatyn. Ol daıyndyqtan eshqashan qashpaıdy, únemi ýaqytyly keledi. Jattyqtyrýshy qoıǵan tapsyrmany barynsha tııanaqty ári sapaly oryndaýǵa tyrysatyn. Tik sóılep, emotsııaǵa erik bergenin kórgen emespin. Qandaı da bir taktıkany nemese ádisti tolyq ıgergenge deıin toqtaýsyz eńbek etetin, - dep pikir bildirdi Davron Ergashev.
Abdýkodır Hýsanovtyń fýtboldy tańdaýyna jáne onyń kásibı oıynshy bolyp qalyptasýy jolynda ákesiniń orny erekshe. Hıkmat Hashımovtyń ózi kezinde Ózbekstan ulttyq quramasynyń sapynda óner kórsetken.
- Abdýkodır Hýsanov sportshylar otbasynda dúnıege keldi. Onyń bolashaǵyna osy áser etse kerek. Hıkmat Hashımov kásibı fýtbolshy jáne jattyqtyrýshy retinde ulyna durys nusqaý berip, «Energetık-BGÝ» komandasyna aýystyrdy. Bul - Abdýkodır Hýsanovtyń bolashaǵyna jol ashqan mańyzdy sheshim dep sanaımyn. Endi sonyń nátıjesine bárimiz kýá bolyp otyrmyz, - dep pikir bildirdi A.Ibragımov.
Alısher Ibragımov jattyqtyrýshylyq qyzmetinen qol úzgen emes. Búginde ol Tashkenttegi fýtbol klýbtarynyń birinde Abdýkodır Hýsanovtyń izbasarlaryn baptaýmen aınalysyp keledi.
- Buryn ózbekstandyq jastar Krıshtıaný Ronaldý syndy bolamyn dese, qazir barlyǵy Abdýkodır Hýsanovtyń dárejesine jetýdi armandaı bastady. Maǵan osyndaı úzdik fýtbolshyny jattyqtyrý baqyty buıyrdy, oǵan óte qýanyshtymyn. Bul tek meniń emes, jalpy Ózbekstannyń maqtanyshy. Abdýkodır Hýsanovqa eliktep ósip kele jatqan búldirshinder bolashaqta joǵary nátıjege qol jetkizedi dep senemin, - deıdi ol.
Suhbat barysynda A.Ibragımov shákirtiniń jetistiginen bólek, ózbek fýtbolynyń damýyna qatysty da pikir bildirdi. Ózbekstan bul sportqa mıllıardtaǵan qarajat bólmeıdi. Paıdasyz legıonerlerge aqsha shashpaıdy. Jas talanttar kishigirim jekemenshik mektepterden shyǵady.
- Ulttyq quramadan jaqsy nátıje kútý úshin eń aldymen balalar fýtbolyna erekshe mán berý kerek. Myna mektepti ádeıi qalanyń shet jaǵynan ashtyq. Sebebi talanttardyń kóbi aýyl aımaqtardan shyǵady degen támsil bar. Birer jylda buǵanalaryn qatyryp, úlken fýtbolǵa shyǵaramyz. Bizde qazir býyn aýysty. Ózbek fýtbolynyń bolashaǵy zor, - dep toqtaldy.
Kórshi eldiń ulttyq quramasy 2026 jyly AQSh, Meksıka, Kanada birigip ótkizetin álem chempıonatyna barýǵa bir taban jaqyn tur. Komanda oıynshylary álemniń úzdik klýbtarynda dop tebedi. Tarıhı sátti kórshi el asyǵa kútedi.
- Sońǵy jyldary shetelderde ózbek fýtbolshylaryna suranys artty. Sebebi bizdiń jigitter kóp aqshaǵa qyzyqpaýdy, qıyndyqtan qoryqpaýdy úırendi. Az qarajatqa oınap, ózińdi dáleldep, úlken klýbqa joldama alýǵa bolatynyn túsindi. Bul rette Abdýkodır Hýsanovty úlgi retinde qaraýǵa bolady, - deıdi fýtbol agenti Davron Ergashev.
Aıta keteıik, jalǵyz Hýsanov emes, búginde Eýropa men Azııanyń túrli klýbtarynda 40-tan astam ózbekstandyq fýtbolshy dop teýip júr.
Máselen, Eldor Shomýrodov Italııanyń «Roma» komandasynda óner kórsetedi. Al qorǵaýshy Hýsnıddın Alıkýlov pen jartylaı qorǵaýshy Azızbek Týrgýnboev Túrkııa sýperlıgasyndaǵy komandalardyń beldi oıynshylary sanalady.
Reseıde de birneshe ózbekstandyq oınap júr, sonyń ishinde basty juldyz - Azııanyń úzdik jas fýtbolshysy atanǵan Abbosbek Faızýllaev. Ol Máskeýdiń «TsSKA» klýbynda óner kórsetedi.
Ózbekstandyq fýtbolshy Hýsanov Manchester-Sıtıde oınaýy múmkin ekenin jazǵan bolatynbyz.