Ózbek ultynyń popýlıatsııasyna keńeıtilgen genomdyq zertteý júrgiziledi
TAShKENT. KAZINFORM — Ózbekstanda ózbek ultynyń popýlıatsııasyna keńeıtilgen genomdyq zertteý júrgizý josparlanyp otyr, dep habarlaıdy Kazinform agenttiginiń menshikti tilshisi.
Tıisinshe, taıaýda eldiń Ǵylym Akademııasy irikteý jumystaryna kirisedi. Zertteýge 35-70 jas aralyǵyndaǵy ulty ózbek Ózbekstan azamattary qatysa alady.
Basty talaptardyń biri — qatysýshy aýyr dertterge shaldyqpaǵan bolýy tıis. Kelisim bergen azamattar saýalnama toltyryp, qan tapsyrady. Sonymen qatar, olar tegin medıtsınalyq tekserýden ótedi.
Eske salaıyq, bul kúnderi Ózbekstanda halyq sanaǵy ótip jatyr. Qańtar aıynyń sońyna deıin 30 mıllıonǵa jýyq adam onlaın tirkeýden ótti. Endi 28 aqpanǵa deıin sanaqtyń ekinshi kezeńi júrgiziledi. Bul jaǵdaıda statıstıka organdarynyń qyzmetkerleri úı aralap, tirkeýden ótpegen turǵyndar týraly derekterdi bazaǵa engizedi.
Buǵan deıin habarlaǵanymyzdaı, byltyr Ózbekstanda týý kórsetkishi tómendedi.