Ózbek tarapy óz azamattaryn Taıaý Shyǵys elderine ýaqytsha barmaýǵa shaqyrdy
TAShKENT. KAZINFORM — Ózbekstannyń Syrtqy ister mınıstrligi qajylyq, demalys jáne basqa da maqsatta Taıaý Shyǵys elderine barýǵa nıetti azamattarǵa saparlaryn keıinge shegerýdi usyndy, dep habarlaıdy Kazinform agenttiginiń Tashkenttegi menshikti tilshisi.
Vedomstvonyń baspasóz qyzmetinen málim etkendeı, birqatar el ózderiniń áýe keńistigin paıdalanýǵa shekteý engizdi. Osyǵan baılanysty halyqaralyq reıster keshigip, tranzıttik marshrýttar jabylyp jatyr.
Sáıkesinshe, mınıstrlik ózbekstandyqtarǵa jaǵdaı turaqtalǵanǵa deıin Taıaý Shyǵys elderine josparlanǵan saparlaryn keıinge qaldyrýdy usyndy.
Buǵan qosa, vedomstvo shet memleketterdiń aýmaǵynda júrgen azamattarǵa saqtyq tanytyp, adamdar kóp jınalatyn jerlerge barmaý kerektigin eskertti. Bul rette mınıstrlik elshilik men konsýldyq mekemelerdiń qyzmetkerlerimen turaqty baılanysta bolý qajettigin eske saldy.
Eske salaıyq, 28 aqpanda Izraıl Iranǵa soqqy jasady. Sol kúni Iran Izraılge qarymta jaýap retinde birneshe zymyran jiberdi.
Keshe Irannyń IRNA memlekettik aqparat agenttigi eldiń Joǵarǵy kóshbasshysy aıatolla Álı Hameneı qaza tapqanyn habarlady. Buǵan qosa, Alı Hamenenı keńesshisi — Iran Qorǵanys keńesiniń hatshysy Álı Shamhanı men Islam revolıýtsııasy saqshylary korpýsynyń qolbasshysy Mohammad Pakpýrdyń kóz jumdy.
Keıin Aıatolla Arafı Irannyń ýaqytsha joǵary jetekshisi bolyp taǵaıyndaldy.
Búgin AQSh prezıdenti Donald Tramp Iranǵa qarsy áskerı operatsııa qoıylǵan mindetter tolyq oryndalǵanǵa deıin jalǵasatynyn habarlady.
Munymen birge, Taıaý Shyǵystaǵy turaqsyzdyq saldarynan munaı baǵasy kóterilip, aktsııalar quldyrady.