Ózbek senatorlaryn Qazaqstanmen aradaǵy áýe reısteriniń baǵasy alańdatyp otyr
TAShKENT. QazAqparat – Ózbekstandyq senatorlar Qazaqstanmen aradaǵy áýe reısteriniń baǵasy qymbat ekenine alańdaýly, dep habarlaıdy QazAqparat tilshisi Ózbekstan Respýblıkasynyń Olıı Májilis Senatynyń resmı saıtyna silteme jasap.
Áýe bıletteriniń qymbattyǵyna baılanysty tıisti senatorlyq saýal Ózbekstannyń Monopolııaǵa qarsy komıtetiniń tóraǵasyna jiberildi.
«Búginde ushý ýaqyty 1 saǵat 10 mınýt bolatyn Tashkent–Almaty baǵyty boıynsha bir baǵyttaǵy áýe bıletiniń baǵasy 4 mln 700 myń sýmdy quraıdy. Al ushý ýaqyty 3 saǵat 40 mınýt bolatyn Tashkent–Máskeý baǵyty boıynsha avıabılettiń baǵasy 4 mıllıon 200 myń sým, Tashkent–Rıga baǵyty boıynsha – 2 mıllıon 800 myń sým (ushý ýaqyty - 5 saǵat 30 mınýt) jáne Tashkent – Nıý-Iork baǵyty boıynsha 6 mıllıon 500 myń sým (ushý ýaqyty-12 saǵat). Bul rette ushaqtyń túrleri birdeı», - delingen resmı saýalda.
Tıisti taldaý jáne halyqpen tikeleı dıalog negizinde depýtattar Qazaqstanmen aradaǵy áýe reısteriniń baǵasy tym joǵary ekenine alańdaýshylyq bildirdi.
«Kórip otyrǵanymyzdaı, ushý ýaqyty 1 saǵat 10 mınýt bolatyn Tashkent-Almaty baǵyty boıynsha bir baǵyttaǵy áýe bıletiniń baǵasy birneshe saǵatqa uzaǵyraq ushatyn reısterge belgilengen baǵadan edáýir joǵary. Bul túsiniksiz jaǵdaı, artyq shyǵyn shyǵarýǵa májbúr bolǵan azamattarymyz úshin qıyndyqtar týǵyzady», - dep atap ótti ózbek senatorlary.
Mádıbek Jánibekov
