Ózbek olıgarhy Álisher Ýsmanov londondyq «Arsenaldy» satyp alýǵa daıyn
ASTANA. 31 qańtar. QazAqparat - Qazirdiń ózinde «Arsenal» fýtbol klýbynyń 29, 95 paıyz aktsııasynyń ıesi Álisher Ýsmanov kanonırlerdiń klýbyn tutastaı satyp almaq nıette.
Áıtse de, londondyq klýbtyń basshylary «Arsenaldyń» taǵdyryn ózbek baıyna emes, amerıkalyq Sten Krenkege tapsyrǵysy kelip otyr eken. Soǵan qaramastan ákálap-ýkálap adamdardyń ishi baýyryna kirip ketetin Álisher myrza klýb jankúıerlerin óz aýzyna qaratyp, klýbty satyp alǵan jaǵdaıda bar qarajatyn salýǵa, tipti, sý jańa sýper oıynshylardy da alatynyn málimdep otyr, dep jazady «Aladop» gazeti.
L'Equipe basylymyna bergen suhbatynda: «Arsen Venger álemdegi eń myqty bapkerlerdiń biri. Biraq, onyń jumysy tym aýyr. Onyń jumysyn jeńildetý kerek. Kerek kezde ol qalaǵan qymbat oıynshylardy satyp alyp berý kerek. Biraq, búgingi klýbtyń saıasaty boıynsha Arsen bapker qymbat fýtbolshylardy satyp ala almaıdy. Sóıtip alyp olar bapkerden jaqsy oıyn talap etedi. Búgingi kúnderi klýbtyń taǵdyry mıster Krenkeniń qolynda. Ol meniń ıdeıalarymmen sanaspasa da, men oǵan sáttilik tileımin. Arsen Venger qos birdeı myqty komanda jasaqtap shyǵardy. Olardyń birinshisi - bizdiń negizgi básekelesterimizge qarsy oınasa, ekinshisi - chempıoanattaǵy eń joǵarǵy oryndarǵa talasýda. Biraq, «Arsenal» meniń kómegime zárý emes sııaqty. Men myqty adammyn. Eger de bireýge meniń ıdeıalarym, kómegim qajet bolsa, árqashanda járdem berýge daıynmyn»,-dedi.
Álisher Ýsmanov 1953 jyly Ózbekstanda dúnıege kelgen. Ákesi Býrhan Ýsmanov Tashkent qalasynyń prokýrory bolǵan. Bala kezinen qylyshtasýdyń qyr-syryn meńgerip ósken bala Álisher, er jetkende Máskeý memlekettik halyqaralyq ýnıversıtetine oqýǵa túsedi. Jas kezinen orys jerinde turyp úırenip qalǵannan soń, 91-jyldary Reseıde qalyp qalady. Ekonomıka salasynda biraz tabystarǵa jetip, kásipkerlikpen aınalysyp búginderi 20 mlrd AQSh dollarynyń ıegeri. Forbes jýrnalynyń 2012 jyly jarııalaǵan nátıjesi boıynsha Reseıdegi eń baı adam bolyp tirkeldi.
