Ózbek muǵalimderine jalaqy ornyna balapandar berildi
ASTANA. 12 sáýir. QazAqparat - Ózbekstandaǵy Buhar oblysynyń muǵalimderi men medıtsına qyzmetkerleri jalaqylarynyń bir bóliginiń ornyna Serbııadan ákelingen balapandar aldy, dep habarlaıdy Lenta.rý.
«Azattyq radıosynyń» habarlaýynsha, Vabkent aýdanynyń bıýdjettik qyzmetkerlerine 20 myń balapan úlestirilip berilgen, jaqyn arada taǵy 40 myń balapan úlestiriledi.
Odıl esimdi bir muǵalimniń aıtýynsha, bul shara olardyń erkinen tys júrgizilgen. «Bizdi 10 balapannan alýǵa mújbúrledi, - deıdi ol - Árbir serbııa balapany 5,5 myń somǵa baǵalanady (memlekettik kýrs boıynsha 3 dollar, «qara» naryqta 2 dollar), al jergilikti balapandar arzandaý. Degenmen, biz olardy alýdan bas tarta almaımyz, óıtkeni basqa amalymyz joq».
Degenmen sheneýnikterdiń aıtýynsha, balapan taratý naýqany erikti túrde júrgizilýde. Onymen qoımaı, olar bul sharanyń tıimdi ekenin aıtyp, basqa da aýdandarda qarastyrý kerek degen pikirde. «Azattyq radıosynyń» aıtýynsha, Tashkentte tipti memlekettik jalaqynyń ornyna ýkraınalyq buzaýlardy taratý sharasy da qarastyrylyp jatqan kórinedi.
Mamandardyń pikirinshe, osyndaı qylyqtarymen jergilikti sheneýnikter qolma-qol aqshanyń jetispeýshiligin joıyp, bıýdjet shyǵynyn azaıta túspek. Qazirgi ýaqytta resmı derekter boıynsha eldegi ortasha aılyq jalaqy 320 AQSh dollaryna teń kelip otyr. Al Tashkentten basqa óńirlerde bul san 100 dollardan ázer asyp jyǵylady.
