Ózbek kásipkerleri birlesip jıhaz shyǵarýdy qalaıdy
ASTANA. QazAqparat - Tashkent qalasynda Qazaqstannyń Ózbekstandaǵy Tótenshe jáne Ókiletti Elshisi Erik Ótembaev osy eldiń Saýda-ónerkásip palatasynyń basshysy Adxam Ikramovpen kezdesti, dep xabarlaıdy QazAqparat tilshisi.
Kezdesý kezinde Qazaqstan men Ózbekstan prezıdentteri kótergen bastamalardy iske asyryp, úsh jyldan keıin eki jaqty saýda aınalymyn 5 mlrd dollarǵa deıin jetkizý jaıy sóz boldy. Osy oraıda elshi Ótembaev birlesken jobalardy qolǵa alýdy usyndy. Máselen, eki eldiń kásipkerleri klasterlik, ıaǵnı naqty bir salada ortaq óndiristerdi asha alady. Taraptar tekstıl ónerkásibi, xımııa, agroxımııa, sondaı-aq qurylys materıaldary boıynsha birlesip jumys jasaý máselesin qarastyrýǵa kelisti.
Al kórshi eldiń ókili Adxam Ikramov ózbek kásipkerleriniń ormandy óńdeý men birlesken jıhaz kásiporyndaryn qurýǵa qulshynys tanytyp otyrǵanyn jekizdi. Osynyń bárin eskere otyryp, eki jaq jaqyn arada naqty jobalar boıynsha usynys daıarlaýdy uıǵardy. Ózbekstan óz kásipkerleriniń tizimin usynady. Qazaqstandyq bıznesmender bolsa, odan óz áriptesterin tańdaı alady.
