Ózbek ǵalymy Prezıdent Joldaýy týraly: Ortalyq Azııadaǵy sý máselesin birlesip qana sheshe alamyz

TAShKENT. QazAqparat – Qazaqstan saıası júıeni aýqymdy túrde qaıta júkteý arqyly strategııalyq áleýmettik-ekonomıkalyq maqsattarǵa kóbirek mán berip, Joldaýda aıtylǵan mejelerdi baǵyndyrýǵa kúsh salady. Ózbekstan Ǵylym Akademııasynyń Memleket jáne quqyq ınstıtýtynyń aǵa ǵylymı qyzmetkeri Ravshan Nazarov osyndaı pikir bildirdi, dep habarlaıdy QazAqparat tilshisi.

«Qazaqstan ekonomıkasynyń keıingi jyldary qarqyndy damý jolyna túskeni Memleket basshysy Joldaýda nusqaǵan strategııalyq mindetterdi eńserýge múmkindik beredi dep úmittenýge bolady», - deıdi sarapshy.

Sondaı-aq, ol Ortalyq Azııada sý problemasy ózekti bola túskeni Joldaýda kórinis tapty dep esepteıdi. Jyl saıyn 150 myń gektar alqapqa sý únemdeıtin tehnologııany engizý tapsyrmasy berildi. Ol úshin 20 jańa sý qoımasy salynyp, qoldanystaǵy 15 nysan kúrdeli jóndeýden ótýi kerek. 3,5 myń shaqyrym sý arnasyn tsıfrlandyryp, jańǵyrtý qajet. Sý resýrstary jáne ırrıgatsııa mınıstrliginiń qurylýy, Ulttyq gıdrologııalyq qyzmettiń qaıta qurylýy da osy problemany tezdetip sheýge baǵyttalyp otyr.

«Sýarmaly egistikke qarap otyrǵan Ortalyq Azııa elderi úshin sý resýrstarynyń sapasy - óte mańyzdy másele. Osyǵan baılanysty shekaralas elder bul saladaǵy áriptestikti jolǵa qoıyp, ásirese transshekaralyq ózenderdi paıdalaný, sýdy ádiletti bólisý jáne ashyq basqarý, sý únemdeıtin tehnologııalardy qatar engizý sııaqty baǵyttarǵa basymdyq berý kerek. Tipti, ol úshin keńes zamanyndaǵy «Sibirdi qaıta jandandyrý» jobasyna qan júgirtý kerek sııaqty. Óıtkeni, sý tapshylyǵy artyp keledi», - deıdi ol.

Ravshan Nazarov Qazaqstan Prezıdentiniń kólik-logıstıka salasyndaǵy áleýetti tıimdi paıdalaný týraly bastamalaryna toqtaldy.

«Qazaqstannyń kólik-logıstıka salasyndaǵy áleýeti shynymen aýqymdy. Ortalyq Azııa elderiniń óńirlik haby bola alady. Óıtkeni, Reseı, Qytaı sııaqty alyp naryqtarmen shekarasy uzaqqa sozylyp jatyr. Sonymen birge, Kaspııdiń porttaryna ońaı shyǵa alady», - deıdi ǵalym.

Sarapshy tsıfrlandyrý men ІT salaǵa Joldaýda jeke kóńil bólingenin erekshe atady.

«Ortalyq Azııanyń barlyq memleketteri «jas» bolyp esepteledi. Bul jerde men halqynyń orta jasyn aıtyp otyrmyn. Sondyqtan, Qazaqstannyń jastar saıasatyna erekshe kóńil bólip otyrǵanyn óńirdegi ózge memleketter úlgi etýi kerek», - deıdi Ravshan Nazarov.