Ózbek fýtbolshylaryn túngi klýbqa barǵany úshin fýtboldan shettetýi múmkin
TAShKENT. QazAqparat - Ózbekstanda fýtbolshylardyń salaýatty ómir saltyn ustaýyn qadaǵalaıtyn arnaıy komıssııa quryldy, dep habarlaıdy «QazAqparat» HAA menshikti tilshisi.
Ózbekstan fýtbol qaýymdastyǵynyń deregi boıynsha, bul shara sportshylardy jemqorlyqtan, para alýdan, kelisip oınaýdan, totalızatordan jáne taǵy basqa fýtboldy damytýǵa qaıshy keletin áreketterden qorǵaıdy. Budan bólek, arnaıy komıssııa fýtbolshylardyń salaýatty ómir saltyn ustanýyn qadaǵalaıdy. Іshimdik ishken, temeki, qorqor shekken oıynshylar fýtboldan shettetýleri múmkin.
«Keıbir oıynshylar ýaqyttaryn tańǵa deıin túngi klýbtarda ótkizip, ishimdik iship, qorqor shegip júredi. Bul mańyzdy oıyndardyń aldynda daıyndyqtaryna kedergi bolady. Mundaı jaǵdaılar halyqaralyq arenada qurama komandalardyń oıyndarynda da bolýy múmkin. Sondyqtan, men árbir oıynshynyń kásipqoı bolýy tıis ekendigin atap ótkim keledi. Olar eń aldymen, ózderiniń dene daıyndyqtaryna alańdaýlary kerek. Sondyqtan, arnaıy komıssııa úlken kólemdegi aqshalardy oıyn-saýyqqa jumsap, salaýatty ómir saltyn ustanbaıtyn fýtbolshylardy anyqtaıtyn bolsa, olar ómir boıyna fýtboldan shettetiledi», - dep málimdedi Ózbekstan fýtbol qaýymdastyǵynyń birinshi vıtse-prezıdenti Ýmıd Ahmatdjanov.
Avtor: Mıras Qýandyqov
