Ózbek boksshysy Danııar Eleýsinovti basyp ozdy
ASTANA. QazAqparat - Halyqaralyq áýesqoı boks qaýymdastyǵy (AIBA) 2016 jyldyń úzdik boksshysyn anyqtady. Daýys berý naýqany uıymnyń "Tvıtter" jelisindegi resmı paraqshasynda júrgizildi, dep xabarlaıdy QazAqparat tilshisi.
Bas kezinde Rıo Olımpıadasynda 69 kelige deıingi salmaq dárejesinde chempıon atanǵan qazaqstandyq boksshy Danııar Eleýsinov oq boıy ozyq turǵan. Alaıda bertin kele, jeńil salmaqtaǵy Olımpıada chempıony, Vel Barker kýbogynyń ıegeri, ózbek boksshysy Hasanboı Dýsmatov onyń aldyn orap, 77 paıyzben birinshi orynǵa shyqty. Osylaısha, H.Dýsmatov jyldyń úzdik boksshysy atanyp otyr. D.Eleýsinov bolsa, daýystyń 18 paıyzynan asa almady. Al kýbalyq Robeısı Ramıres 5 paıyz daýyspen úshinshi orynǵa turaqtady. Ol 56 keli salmaq dárejesinde chempıon atanǵan bolatyn.
Aıta keteıik, Rıo Olmpıadasy kezinde H.Dýsmatovtyń salmaǵynda Birjan Jaqypov óner kórsetken edi. Shırek fınalda ol ózbek boksshysynan 0:3 esebimen utyldy.
