Ózbek azamatyna bir gramm gashısh úshin 1,2 mln teńge aıyppul salyndy
ASTANA. QazAqparat - Mańǵystaý oblysynyń Beıneý aýdandyq sotynda Ózbekstan azamatyna qatysty qylmystyq is qaraldy, dep habarlaıdy QazAqparat tilshisi.
Sot materıaldaryna sáıkes, bıyl naýryz aıynda S. esimdi ózbek azamaty Reseıdiń Sankt-Peterbýrg qalasynan shyǵyp, Qazaqstan arqyly óz eline jetkisi kelgen. Alaıda «Tájen» baqylaý beketinde kedenshiler ıttiń kómegimen onyń shulyǵynan 1,54 gramm gashıshti taýyp aldy. Aıyptalýshy atalǵan esirtki zaty úshin qylmystyq jazanyń qarastyrylǵanyn bilgen. Bile tura, gashıshti paıdalanǵan. Al memlekettik shekaradan ótý arqyly esirtki zattarynyń kontrabandasyn jasady.
«Sot otyrysy kezinde S. esimdi azamat óz kinásin tolyǵymen moıyndady. Shyn kóńilmen ókinetinin, sondaı-aq, kámelettik jasqa tolmaǵan balalarynyń bar ekenin jetkizdi. Sýdıa sonyń barlyǵyn eskere otyryp, ony 500 aılyq eseptik kórsetkish, ıaǵnı 1 202 500 teńge kóleminde aıyppul tóleýge mindettedi», - delingen sottyń resmı habarlamasynda.
Foto: penzavzglyad.ru
