Ózbek azamatyn urlaǵan OQO-nyń bes turǵyny qamaýǵa alyndy
TALDYQORǴAN. QazAqparat - Almaty oblysynda ózbek azamatyn urlap, aqsha talap etkender ustaldy. Qazir Ońtústik Qazaqstan oblysynyń 25-28 jastaǵy bes turǵyny qamaýda otyr, dep habarlaıdy QazAqparat tilshisi.
Ustalǵan kúdiktiler ózbek azamatyn urlap, týystarynan 350 myń teńge aqsha talap etken. Oqıǵa Іle aýdanyndaǵy Qaraoı aýylynda boldy. Ózbek azamaty qurylys nysanynda brıgadır bolyp jumys istegen. Ony bes jigit kúshtep kólikke otyrǵyzyp, belgisiz jaqqa alyp ketken.
«Jedel izdestirý sharasy barysynda jábirlenýshi Qarasaı aýdanyndaǵy jer úılerdiń birinde ekeni anyqtaldy. Uıymdasqan qylmysqa qarsy kúres basqarmasynyń jedel ýákilderi Іle aýdandyq ІІB-niń polıtseılerimen birlesip, tutqynǵa alynǵan azamatty bosatty. Jábirlenýshi týystaryna aman-esen oraldy», - dedi ІІD-niń baspasóz qyzmetindegiler.
Qazir bes azamat ustaldy. Barlyǵy Ońtústik Qazaqstan oblysynyń turǵyndary. Olar Almaty jáne Almaty oblysynyń aýmaǵyndaǵy qurylys nysandarynda jaldanyp eńbek etken. Atalǵan oqıǵaǵa baılanysty olardyń ústinen birden 3 bap («Adam urlaý», «Bopsalaý» jáne «Zańsyz bas bostandyǵynan aıyrý») boıynsha qylmystyq is qozǵaldy. 25-28 jastaǵy kúdiktiler qamaýda otyr.
