Ózbek azamaty keden beketinde 200 gramǵa jýyq altynmen ustaldy

ASTANA. 27 qarasha. QazAqparat - Keshe 26 qarashada «Qaplanbek»  keden beketiniń qyzmetkerleri «Brıllıant»  jedel-aldyn alý operatsııalaryn júrgizdi.

Osyǵan oraı «RAPISKAN» rentgenografııalyq jáne Skanpassajır «Kompas» kedendik baqylaýdyń tehnıkalyq quraldary arqyly tekserý kezinde Ózbekstan Respýblıkasynyń azamatynan  qol sómkesiniń temir ustaǵyshyna jasyrylǵan 5 tsellofan paketke oralǵan sary tústi untaq jáne 1 rezińke orama sary tústi temir untaǵy tabylǵan. Ózbek azamaty Reseıden ákelingen bul zattardy kedendik baqylaýdan jasyryp alyp ótpek bolǵany anyqtaldy. Bul týraly Ońtústik Qazaqstan oblysy kedendik baqylaý departamentiniń baspasóz qyzmetinen habarlandy.

Ózbek azamaty óz túsiniktemelerinde, alynǵan sary tústi temir untaqtyń 150-200 gramm salmaqtaǵy altyn ekenin jáne ony Reseıdiń Habarovsk ólkesindegi Ohot aýdanyndaǵy altyn óndiretin zaýytta jumys istep júrip jınaǵanyn aıtty. Atalǵan fakti boıynsha materıal QR QK 209 baby boıynsha tirkeldi. Qazirgi tańda tekserý jumystary júrgizilýde jáne sot saraptama taǵaıyndaldy, nátıjesi boıynsha protsessýaldyq sheshim qabyldanatyn bolady.