Ózbek azamattaryn Reseıge asyrmaq bolǵan oraldyq turǵynnyń bostandyǵy shekteldi

ORAL. QazAqparat - Oral qalalyq sotynyń úkimimen Ózbekstan azamattarynyń Reseı aýmaǵyna ótýin zańsyz uıymdastyrǵan I.Shvedıýk QR QK 394-baby 2-bólimine sáıkes aıypty dep tanylyp, onyń eki jylǵa bas bostandyǵy shekteldi, dep habarlaıdy QazAqparat tilshisi.

BQO prokýratýrasynyń baspasóz qyzmetinen túsken málimetke qaraǵanda, atalǵan turǵyn tergeý barysynda anyqtalmaǵan adamdarmen sóz baılasyp, bıylǵy 18 sáýir kúni Ózbekstan azamattary T.Inoıatov, Z.Tájibaeva, T.Ergashev, Sh.Toshmırzoev jáne A.Ýsmonovty Zelenov aýdanyndaǵy Qazaqstan shekarasyna deıin jetkizgen. Sodan keıin Qazaqstan azamattary I.Ermeshev pen M.Dıakonov atalǵan adamdardy Orynbor oblysy Pervomaı aýdanyna shekara arqyly ótkizgen. Alaıda 19 sáýir kúni olardyń barlyǵy Reseı federaldyq qaýipsizdik qyzmeti shekara jasaǵy qyzmetkerleriniń qolyna túsken.

Sot úkim shyǵarǵan kezde I.Shvedıýktiń orta dárejeli dep baǵalanǵan qylmysqa birinshi ret barǵandyǵyn eskerdi.

Sot úkimi zańdy kúshine endi.