«Ózbek áýejoldary» reısterinde ishimdik ishýge tyıym salyndy
ASTANA. 5 aqpan. QazAqparat - Ózbekstannyń ulttyq «Ózbek áýejoldary» áýekompanııasy jolaýshylarǵa ushý kezinde duty free dúkenderinen satyp alǵan ishimdikterdi ishýge tyıym saldy. Bul jaıynda «Novostı» aqparat agenttigi habar taratty. muslim.kz saıtynyń jazýynsha, bul tyıym Qaýipsiz ushýdy qadaǵalaý jónindegi respýblıkanyń memlekettik ınspektsııasynyń buıryǵy negizinde engizildi.
Derekkózden belgili bolǵandaı, jolaýshylar ushý kezinde ishetin ishimdikterdiń mólsherine de shekteý engizilgen. Endigi jerde jolaýshylarǵa tasymaldaýshylar usynǵan mólsherde ǵana ishimdik ishýge ruqsat etilgen.
Buǵan qosa, jolaýshylarǵa elektrondy shylym shegýge de tyıym salyndy. Bul tyıym «Ózbek áýejoldarynda» 2008 jyly, al respýblıka áýejaılarynda 2012 jyly engizilgen bolatyn.
Atalmysh buıryqqa sáıkes jolaýshylar ekıpaj múshesine qoǵamdyq tártipti buzyp, qater tóndirgenderdiń ústinen shaǵymdana alady.
Ózbektsandaǵy monopolııalyq áýetasymaldaýshy «Ózbek áýejoldary» basy-bútin memleket menshigi bolyp tabylady. Onyń reısteri Eýropa, Amerıka, Taıaý Shyǵys, Azııa elderiniń 21 qalasyna, sondaı-aq, TMD-nyń 22 qalasyna, jergilikti áýejoldar boıynsha 11 baǵytqa qatynaıdy. 2012 jyldyń qorytyndysy boıynsha áýekompanııa 2,6 mln adam tasymaldaǵan. Bul ótken jylǵy kórsetkishke qaraǵanda 13,5 paıyzǵa artyq.
Qazirgi ýaqytta Reseıde duty free dúkenderinen satyp alynǵan alkogoldi ishimdikterdi ushaqtyń bortynda ishýge zańmen tyıym salý máselesi qarastyrylyp jatyr. Bul bastama ushaq bortynda iship alyp, álek salyp, shý shyǵarǵandarmen baılanysty eki jaǵdaı tirkelgendikten kóterilip otyr. Sonyń bireýinde ishimdik iship, masaıǵan jolaýshynyń kesirinen Tashkentte «Aeroflot» laıneri eriksiz qonýǵa májbúr bolyp edi. Al ekinshi jolaýshy «Qoǵalymavıa» bort serigin jaraqattaǵan bolatyn.
