Ózara yntymaqtastyq pen odaqtastyqtyń jańa deńgeıine kóterilip jatyrmyz – Ilham Álıev

ASTANA. QazAqparat – Ázerbaıjan men Qazaqstan qarym-qatynasynyń negizi – gýmanıtarlyq sala. Bul týraly Aqordada Memleket basshysy Qasym-Jomart Toqaevpen keńeıtilgen quramda kelissóz júrgizgen Ázerbaıjan Prezıdenti Ilham Álıev aıtty, dep habarlaıdy QazAqparat tilshisi.

«Eń aldymen, Qazaqstanǵa resmı saparmen shaqyrǵanyńyz úshin taǵy da alǵys aıtamyn. Baýyrlas qazaq jerine kelgenime qýanyshtymyn. Bizdiń qarym-qatynasymyz nyǵaıyp keledi. Halyqtarymyzdyń arasyndaǵy baılanystyń tarıhy tereń ári biz árdaıym bir-birimizge baýyr retinde qaraımyz. Búgin osy berik irgetastyń negizinde keleshegimizdi birge quryp jatyrmyz. Biz buǵan deıin talqylaǵan yntymaqtastyqtyń barlyq salasynyń áleýeti mol», - dedi ol.

Ázerbaıjan Prezıdenti gýmanıtarlyq saladaǵy yntymaqtastyqtyń aıryqsha mańyzdy ekenine toqtaldy.

«Qazaqstannyń Ázerbaıjandaǵy, sondaı-aq Ázerbaıjannyń Qazaqstandaǵy mádenıet kúnderiniń uıymdastyrylýy elderimizdi odan ári jaqyndata túsip, halyqtarymyzdyń tereń tarıhy men baı mádenıetin pash etedi. Bizdiń oıymyzsha, memleketaralyq qarym-qatynasymyzdyń negizi – osy gýmanıtarlyq sala. Árıne, eki taraptyń da múddesine saı salalar az emes. Biz, shyn máninde, ózara yntymaqtastyq pen odaqtastyqtyń jańa deńgeıine kóterilip jatyrmyz», - dedi Ilham Álıev.