Ózara túsinistik týraly memorandým shynynda da bizdiń yntymaqtastyǵymyzdaǵy sheshýshi jaǵdaı bolyp otyr - UNODC atqarýshy dırektorynyń orynbasary
ALMATY. Jeltoqsannyń 9-y. QazAqparat /Erlik Erjanuly/ - Biz búgin tarıhı oqıǵanyń kýágeri boldyq. Esirtkige baqylaý jasaý salasyndaǵy óńirlik yntymaqtastyq boıynsha Ózara túsinistik týraly memorandým taraptary úshin de bul úlken jetistik. Ony BUU-nyń esirtki jáne qylmys jónindegi basqarmasy (UNODC) atqarýshy dırektorynyń orynbasary Frensıs Martens búgin Almatydaǵy Ózara túsinistik týraly memorandým taraptarynyń 8-shi kezdesýinde aıtty,
dep habarlaıdy QazAqparat.
"Qazirgi tańda Ortalyq Azııadaǵy esirtkilerdi baqylaý salasyndaǵy jáne qylmysqa qarsy áreketterde UNODC jobalar qorjyny iri jobalardyń biri bolyp otyr. Onyń kólemi 78 mıllıon AQSh dollaryna jetti. Osy ýaqytqa deıin biz jáne Ózara túsinistik týraly memorandýmǵa qatysýshy memleketterde esirtkilerdi baqylaýshy mamandandyrylǵan organdar qurýǵa yqpaldastyq jasadyq. Qazir ony ózge elder de ózderiniń ulttyq vedomstvolary úshin esirtkilerdi baqylaý salasyndaǵy úılestirýshi qyzmette úlgi nemese mysal retinde qarastyrýda", deıdi Frensıs Martens. Onyń aıtýynsha, qazir esirtki tutyný Ortalyq Azııada dabyl qaqtyrar aýqymda. Máselen, 2008 jyly 93 myńnan astam esirtki tutynýshy dıspanserlik esepke alyndy. 2000 jyly ol 67 myń adamdy quraǵan bolatyn. UNODC baǵalaýy boıynsha, aımaqtaǵy esirtki tutynýshylardyń sany dıspanserde esepte turǵandardan 4 ese kóp. Jalpy Ortalyq Azııa memleketteriniń quqyq qorǵaý organdary byltyr aınalymnan 5,3 tonna geroın jáne 4,5 tonna apıyn aldy. Bul derekter aımaqtaǵy atqarylar jumys áli de jetkilikti ekenin kórsetedi.
