Ózara deńgeıles komandalar kezdesedi – «Pafos» bapkeri «Qaıratpen» oıyn jaıly

ALMATY. KAZINFORM – Almatynyń Ortalyq stadıonda ÝEFA Chempıondar lıgasynyń aıasynda «Qaırat» jáne «Pafos» arasynda oıyn ótedi.

«Pafos» fýtbol klýbynyń bas bapkeri Hýan Karlos Karsedo «Qaıratqa» qarsy ótetin oıyn aldynda komandasynyń daıyndyǵy týraly pikir bildirdi.

— Eń aldymen, jyly shyraımen qabyldaǵandaryńyzǵa alǵys aıtqym keledi. Biz Qazaqstanǵa alǵash ret kelip otyrmyz jáne munda bolǵanymyzǵa óte qýanyshtymyz. Erteń bizdi ózimizge uqsas qarsylas kútip tur. «Qaırat» keıingi jyldary aıtarlyqtaı ósip, tuńǵysh ret Chempıondar lıgasynyń jalpy kezeńine shyqty. Bul óte qyzyqty oıyn bolatynyna senimdimin, — dedi ol.

Bapkerdiń aıtýynsha, aldaǵy oıynda dárejesi teń, ózara uqsas komandalar kezdesedi.

— Qazir biz óz chempıonatymyzda kósh bastap turmyz, sol sııaqty «Qaırat» ta óz chempıonatynda birinshi orynda. Bul match alań ıeleri úshin de, biz úshin de jaqsy múmkindik bolady. Kezdesý ońaı bolmaıdy, — dedi ol.

Hýan Karsedonyń sózinshe, ótken oıyndaǵy jeńis komandasyna Almatyǵa sapar aldynda senimdilik syılaǵan.

— Chempıondar lıgasyndaǵy ár oıyn ońaı ótpeıdi. Erteń aýyr match kútip tur, biz bar kúshimizdi salyp, úzdik oıynymyzdy kórsetýge tyrysamyz, — dedi ol.

Baspasóz máslıhatynda BAQ ókilderi bapkerden «Qaırattyń» oıynyn kimmen salystyrýǵa bolatynyn surady.

— «Qaırat» — agressıvti ári shabýylǵa jıi shyǵatyn komanda. Oıyn máneri jaǵynan Kıprdiń «Arıs» klýbyna uqsaıdy. Biraq biz jaqsyraq oınaýǵa tyrysamyz, — dedi Hýan Karsedo.

Maman Almatyǵa sapar men byltyr «Astanaǵa» qarsy ótken matchqa da toqtaldy.

— Sapary jaqsy ótti, shamamen 5-6 saǵatta jettik. Barlyǵy yńǵaıly boldy. Al ótken jyly «Astanamen» bolǵan oıyndy aıtar bolsaq, ol kezde biz 1:0 esebimen jeńdik. Eki komanda da qazir óz chempıonattarynda kóshbasshylar qatarynda. Biraq meniń oıymsha, «Qaırat» «Astanadan» kúshtirek. Erteń bári basqasha bolady. Biz úshin bul upaılar óte mańyzdy, sondyqtan jeńiske jetý úshin bar kúshimizdi salamyz, — dedi ol.

Bapker «Qaırattyń» jas juldyzy Dastan Satpaev týraly da pikir bildirdi.

— Dastan — óte talantty jas oıynshy, jaqsy deńgeı kórsetip júr. Kelesi maýsymda ol «Chelsıge» aýysady. Bul — onyń damýy úshin úlken múmkindik. Qazir kóptegen jas oıynshylar erte jetistikterge jetip jatyr. Sizderde de jaqsy fýtbolshylar bar. Maǵan komandanyń agressıvti oıyny unaıdy. Biz tek bir oıynshyǵa emes, búkil komandaǵa nazar aýdaramyz, — dedi Karsedo.

Eske salaıyq, «Qaırat» fýtbol klýbynyń bas bapkeri Rafael Ýrazbahtın komandanyń daıyndyǵy týraly aıtty.

Erteń oıyn aıaqtalǵannan keıin Ortalyq stadıonnan 6 baǵyt boıynsha 60 avtobýs qatynaıdy.