Ózara daýlasatyn eki memorgannyń isi Úkimet deńgeıinde qaralýy oryndy - mınıstrlik

ASTANA. QazAqparat – Óz mártebesi jáne memleket múddesi úshin ózara daýlasatyn eki memlekettik organǵa qatysty ister Ákimshilik rásimdik-protsestik kodekstiń sheńberinde qaralmaýy tıis. Bul týraly atalǵan salany jetildirýge baǵyttalǵan Ádilet mınıstrliginiń arnaıy tujyrymdamasynda kórsetilgen, dep habarlaıdy QazAqparat tilshisi.

«Ákimshilik ádilet jumys istegen jyly respýblıka sottaryna 740-qa jýyq ákimshilik is kelip tústi. Atap aıtqanda, 2021 jyly - 431, 2022 jyldyń 6 aıynda 309 is tústi. Onda taraptardyń barlyǵy tek memlekettik organdar boldy.

Jeke nemese zańdy tulǵalardyń ne adamdardyń belgisiz tobynyń múddesi úshin emes, óz mártebesi boıynsha teń jáne memleket múddesi úshin ózara daýlasatyn eki memlekettik organ ister boıynsha taraptar bolyp tabylatyn mundaı ister óz máni boıynsha Ákimshilik rásimdik-protsestik kodekstiń sheńberinde qaralmaýǵa tıis. Óıtkeni jalpy alǵanda, ÁRPK-nyń normalary memlekettik organdardyń teris paıdalaný múmkindikterin eskere otyryp, jeke tulǵalardyń quqyqtary men bostandyqtaryn qorǵaýǵa baǵyttalǵan.

Osyǵan baılanysty, atalǵan daýlardy QR Úkimeti deńgeıinde, atap aıtqanda Ádilet mınıstrligi, al tıisti ákimshilik-aýmaqtyq birliktiń atqarýshy organdary, kommýnaldyq zańdy tulǵalar, atqarýshy organdar men kommýnaldyq zańdy tulǵalar, tıisti ákimshilik-aýmaqtyq birliktiń ákimi arasyndaǵy daýlardy retteý máselesin qarastyrý oryndy dep sanaımyz», - dep kórsetilgen tujyrymdamada.

Munymen qosa, Ádilet mınıstrligi prokýrorlardyń ákimshilik sot isin júrgizýge qatysýyn shekteýdi usyndy. Vedomstvo boljamyna sáıkes, bul bastamanyń nátıjesinde shaǵym túsirgen tarap pen jaýap berýshi organdarǵa teń quqyq beriledi.