ÓzA-nyń qurylǵanyna 30 jyl toldy

TAShKENT. QazAqparat – Búgin Ózbekstan ulttyq aqparat agenttiginiń (ÓzA) qurylǵanyna 30 jyl toldy, dep habarlaıdy QazAqparat tilshisi.

Ózbekstan Respýblıkasy Prezıdenti Jarlyǵymen 1992 jyldyń 5 aqpanynda ÓzA qurylǵan bolatyn.

Jalpy, atalmysh agenttiktiń jylnamasy 1918 jyly Tashkentte ashylǵan ROSTA bólimshesinen bastaý alady. Odaq kezinde ÓzTAG boldy.

Qazirgi kúnde belgili jýrnalıst Abýsaıd Kýchımov basqaratyn agenttik ózbek, orys, aǵylshyn, frantsýz, ıspan, nemis, arab, qazaq jáne qytaı tilderinde habar taratady.

ÓzA-nyń shyǵarmashylyq ujymy 1 kúnde 300-den asa materıal daıyndaıdy.

Agenttiktiń respýblıkanyń barlyq oblystarynda tilshileri bar. 2021 jyly 27 maýsym kúni jýrnalısterdiń kásibı merekesine baılanysty barlyq oblystardaǵy tilshilerge avtokólik berildi.

Agenttiktiń mereıtoıyna arnalǵan is-sharaǵa Ózbekstan Jýrnalısteri shyǵarmashylyq odaǵynyń tóraǵasy Olımjon Ýsarov qatysyp, memlekettiń ishki jáne syrtqy saıasatyn, qoǵamdaǵy áleýmettik-ekonomıkalyq ózgerister men jańashyldyqtardy, júzege asyrylyp jatqan reformalardyń mán-maǵynasyn, jetistikterin jarııalaıtyn aqparat agenttiginiń qurylǵanyna 30 jyl tolýymen quttyqtady.

Іs-shara sońynda ÓzA shyǵarmashylyq ujymynyń beldi ókilderine Ózbekstan Jýrnalısteri shyǵarmashylyq odaǵynyń múshelik bıleti men tós belgisi, alǵys hat pen estelik syılyqtar tapsyryldy.