Óz úıiniń aýlasynda oq atqan aýyl turǵynyna aıyppul salyndy
PAVLODAR. QazAqparat - Óz aýlasynda atys qarýynan oq atqan Jelezın aýdanynyń turǵynyna aıyppul salyndy, dep habarlaıdy QazAqparat aýdandyq sottyń baspasóz qyzmetine silteme jasap.
Jelezın aýdandyq soty eldimekende atys qarýynan oq atqan aýdan turǵyny I-ge qatysty isti qarady. Іs materıaldaryna sáıkes, I. Aqtaý aýylynda, keshki saǵat 17.00 shamasynda óz úıiniń aýlasynda ańshylyq myltyǵynan oq atqan.
Sot otyrysynda I. kinásin tolyq moıyndap, sol kúni úıinde shamamen 1 lıtr syra ishkenin aıtty. Sodan keıin ol aýlaǵa shyǵyp, qaldyqtardy shoqyp júrgen qustardy kóredi. Úıinen myltyǵyn alyp shyǵyp, qustarǵa oq atady. Óziniń aıtýynsha, ol álgi qarýdy jarty jyl buryn taýyp alǵan, sodan beri úıinde saqtap kelipti.
Sot úkimimen I. kináli dep tanylyp, oǵan 20 AEK, ıaǵnı 48 100 teńge kóleminde aıyppul salyndy. Al ańshylyq myltyǵy memleket paıdasyna tárkilendi.
Sot úkimi zańdy kúshine engen joq.
