Óz úıinde juma namazyna adam jınaǵan aqtóbelikke aıyppul salyndy

AQTÓBE. QazAqparat – Aqtóbe turǵyny úıine juma namazyn oqý úshin adam jınaǵan. Oǵan 180 myń teńge kóleminde aıyppul salyndy, dep habarlaıdy QazAqparat tilshisi.

Aqtóbe oblystyq polıtsııa departamenti, Ekstremızmge qarsy is-qımyl basqarmasynyń qyzmetkerleri jedel-izdestirý sharasyn ótkizdi. Ákimshilik quqyqbuzýshylyq týraly Kodekstiń «Dinı qyzmet jáne dinı birlestikter týraly QR zańnamasyn buzý» baby boıynsha ákimshilik quqyqbuzýshylyq faktisi anyqtaldy. 57 jastaǵy er adam óz úıiniń jertólesinde 35-40 adamdy jınap, juma namazyn ótkizgen. Dinı qyzmet týraly zańnamany buzǵany úshin úı ıesine 180 570 teńge kóleminde ákimshilik aıyppul salyndy.

«Oblystyń bas sanıtarııalyq dárigeriniń qaýlysyn buzǵany úshin materıal jınalyp, zańdy sheshim qabyldaý úshin oblystyq sanıtarııalyq-epıdemıologııalyq baqylaý departamentine jiberildi», - dedi oblystyq PD baspasóz qyzmetiniń jetekshisi Erbolat Sarqulov.