Ózi turatyn jataqhanada jarylǵysh zat bar dep habarlaǵan aqtóbelik ustaldy
AQTÓBE. KAZINFORM – Aqtóbe qalasynyń 34 jastaǵy turǵyny shaǵyn otbasylyq jataqhanada jarylǵysh zat bar ekenin habarlady. Polıtsııa tekserý jumystarynyń soń habarlamanyń jalǵan ekenin anyqtap, kúdiktini ustady.
Oqıǵa keshe túnde boldy. Er adam polıtsııanyń «102» telefonyna qońyraý shalyp, Aqtóbe qalasyndaǵy shaǵyn otbasylyq jataqhanaǵa jarylǵysh zat qoıylǵanyn habarlaǵan. Oqıǵa ornyna polıtsııa qyzmetkerleri, saperler jetip, ǵımaratty tekserip shyqty.
- Polıtseıler jalǵan habarlama bergen 34 jastaǵy aqtóbelikti jedel anyqtap, bólimshege jetkizdi. Ustalǵan kúdiktiniń mas kúıde bolǵany jáne jataqhana turǵyny ekeni anyqtaldy. Terrorızm aktisi týraly kórineý jalǵan habarlaý deregi boıynsha qylmystyq is qozǵaldy. Aqtóbe oblysynyń polıtsııa departamenti terrorızm aktisi týraly kórineý jalǵan habarlaǵany úshin qylmystyq jaýapkershilik kózdelgenin, mundaı jalǵan habarlama taratqandarǵa 5000 AEK kóleminde aıyppul salynyp, 5 jylǵa deıingi merzimde bas bostandyǵynan aıyrýǵa jazasy qarastyrylǵanyn eske salady,- dedi Aqtóbe oblystyq PD baspasóz qyzmetiniń jetekshisi Erbolat Sarqulov.
Aıta keteıik, jyl basynan beri oblysta terrorızm aktisi týraly 7 jalǵan habarlama túsip, tekserildi. Onyń ishinde eki habarlama kámeletke tolmaǵandardan tústi.
