Óz-ózinen jarylyp jatqan Galaxy Note 7 Qazaqstanda áli satylymǵa túsken joq
ASTANA. QazAqparat - Ońtústik Koreıanyń Samsung kompanııasy batareıalary jarylyp jatqan Galaxy Note 7 telefonyn Qazaqstan naryǵyna engizip úlgermegen eken. Kompanııanyń Qazaqstandaǵy ókildiginiń baspasóz qyzmeti habarlaǵandaı, Galaxy Note 7 telefondary sapaly ári qaýipsiz kúıinde osy jyldyń kúzinde Qazaqstan naryǵynda resmı túrde paıda bolady.
«Eń áýeli aıtarym, Qazaqstanda Galaxy Note 7 telefondary resmı túrde satylymǵa shyqqan joq. Qaýipsizdik pen sapanyń barlyq standartyna saı ónim 2016 jyldyń kúzinde resmı túrde satylymǵa shyǵady. Aıta keterligi, Samsung kompanııasynyń basty mindeti - joǵary sapaly ónim óndirý, sondyqtan, jańa qurylǵyǵa qatysty oqys oqıǵalar týraly aqparatqa kompanııa qatty kóńil aýdardy. Kompanııa úshin tutynýshylardyń qaýipsizdigi basty orynda turǵandyqtan, kompanııa qazir bul qurylǵynyń satylymyn ýaqytsha toqtatty», - deıdi mán-jaıdy túsindirgen ókildiktiń baspasóz hatshysy Alısa Bespalova.
Baspasóz hatshy atap ótkendeı, Galaxy Note 7 telefony resmı túrde satyla bastaǵan elderde, Samsung kompanııasy kelesi aptadan bastap osy qurylǵyny tegin aýystyra bastaıdy. «Árıne, jańa ónimge qatysty oqys oqıǵalar tutynýshylar úshin yńǵaısyzdyq týdyrǵanyn túsinip otyrmyz. Biraq, qaýipsizdikti birinshi orynǵa qoıa otyryp, kompanııa jańa telefondy jappaı keri qaıtaryp alady», - deıdi ol.
Aıta keteıik, 19 tamyz kúni álemniń birqatar elinde resmı túrde satylymǵa shyqqan Galaxy Note 7 telefonyn Samsung kompanııasy bir aı ótpeı jatyp, naqtyraq aıtqanda, 10 qyrkúıek kúni qaýipti dep tanydy jáne onyń satylymyn toqtatty. Sebebi, álem boıynsha osy telefon 35 ret óz-ózinen jarylyp ketken. Samsung kompanııasynyń Qazaqstandaǵy resmı ókildigi kúzde elimizde satylatyn bul ónim joǵary sapa men qaýipsiz kúıinde keledi dep sendirdi.
