Óz-ózine qol jumsaý áreketine aýyl turǵyndary jıi barady

Bul týraly búgin Astanada Qazaqstandaǵy sýıtsıd máselesine arnalǵan dóńgelek ústel otyrysy barysynda QR Statıstıka agenttiginiń departament dırektory Gúlnár Quqanova málim etti.

Statıstıka agenttigi ókiliniń keltirgen málimetterine súıensek, 2010 jyly Qazaqstanda 145,9 myń adam qaıtys boldy (2009 jylǵa qaraǵanda 2,2 paıyzǵa kóp). Ólimderdiń 17,7 myńnan astamy nemese 10 paıyzy syrtqy faktorlardan bolǵan. Sonyń ishinde 3 myńnan astam adam óz-ózine qol jumsaý arqyly ómirimen qoshtasqan. Onyń 1728-si qalalyq jerde, 1889-y aýyldarda boldy.

«Bul - sýıtsıdke áreket etkenderdiń syrtyndaǵy sandar. Ókinishke qaraı, resmı statıstıka sýıtsıd oqıǵalarynyń sebepterin zertteýmen aınalyspaıdy. 2010 jylǵa deıingi statıstıkaǵa súıensek, jaǵdaı birshama jaqsarǵanyn kórýge bolady. 100 myń adamǵa shaqqanda 26,9 oqıǵadan kelgen 2007 jylmen salystyrsaq, kórsetkish 2009 jyly - 24, 2010 - 22-ge deıin azaıdy. Álemdik tájirıbede sýıtsıd oqıǵalary 100 myń adamǵa shaqqanda 20-dan asyp ketse, jaǵdaı qaýipti bolyp sanalady. Árıne, Qazaqstanda bul ahýaldyń túıitkili áli azaıǵan joq. Sebebi, bizdiń el Dúnıejúzilik densaýlyq saqtaý uıymynyń málimetteri boıynsha, álemde úshinshi orynda tur», - dep atap ótti ol.

G.Quqanovanyń aıtýynsha, sońǵy ýaqytta óz-ózin ólimge ıtermeleý faktileri 29 jasqa deıingi adamdardyń arasynda artqan. Máselen, 2010 jyly tirkelgen sýıtsıdtardyń jalpy sanynyń 1286-syn nemese 35 paıyzyn atalǵan jasqa deıingi balalar, jasóspirimder men jastar jasaǵan. Atap aıtqanda, 1 myń adamǵa shaqqanda 0-11 jas aralyǵyndaǵy baldyrǵandar arasynda - 5 oqıǵa; 12-14 jas aralyǵynda - 8,3; 15-17 jas aralyǵynda - 19; 18-19 jas - 21; 20-24 jas - 26,2 jáne 25-29 jas aralyǵyndaǵy adamdar arasynda 37,4 oqıǵa tirkeldi.

Sondaı-aq statıstıkalyq derekterge qaraǵanda, 29 jasqa deıingi erler osy jastaǵy áıelderge qaraǵanda óz-ózine úsh ese jıi qol jumsaıtyn kórinedi. 2010 jyly sýıtsıdtan kóz jumǵandardyń jalpy sanynyń 77 paıyzy - erlerdiń, 33 paıyzy áıelderdiń úlesinde.

Ótken jyldyń kórsetkishterine súıenip oblystar boıynsha aıtatyn bolsaq, 29 jasqa deıingi azamattar arasynda sýıtsıd oqılary Shyǵys Qazaqstan oblysynda jıi tirkelgen (182 oqıǵa), odan keıingi orynda Qaraǵandy (154), Almaty (144), Ońtústik Qazaqstan (123), Aqmola (121) jáne Qostanaı oblystary (101) tur.