Óz ózine qol jumsaǵan Eýrazııa Ulttyq ýnıversıtetiniń stýdenti Á. Tanaevanyń isine qatysty qylmystyq is qozǵaldy
ASTANA. Mamyrdyń 12-si. QazAqparat /Aıdar Ospanalıev/ - Óz ózine qol jumsaǵan Eýrazııa Ulttyq ýnıversıtetiniń stýdenti Álına Tanaevanyń isine qatysty qylmystyq is qozǵaldy. Bul týraly búgin Іshki ister mınıstrliginiń Til saıasaty jáne aqparat departamentiniń bastyǵy Qýanyshbek Jumanov málim etti,
dep habarlaıdy QazAqparat.
Esterińizge sala keteıik, QazAqparat osyǵan deıin L.N.Gýmılev atyndaǵy Eýrazııa Ulttyq ýnıversıtetiniń stýdenti Álına Tanaevanyń máıiti sáýirdiń 22-si kúni ózi oqıtyn oqý ornynyń mańynda ósip turǵan aǵashqa asylyp turǵan jerinen tabylǵandyǵyn habarlaǵan bolatyn. Sondaı-aq stýdent qyzdyń máıitiniń janynan qolhat tabylyp, onda stýdent qyz óziniń ólimine kináli ustazdary men kýrstastarynyń aty-jónderin jazyp ketken bolatyn.
Osy oqıǵadan soń Іshki ister mınıstrliginiń ókilderi atalmysh faktige baılanysty sot-medıtsınalyq saraptama taǵaıyndalǵandyǵyn jáne onyń nátıjeleri týraly qosymsha habardar etetindigin málimdegen bolatyn. Búgin jýrnalıstermen bolǵan brıfıngte osy oqıǵaǵa baılanysty qoıylǵan saýalǵa jaýap bergen Q.Jumanov «Astana qalalyq Іshki ister departamentine qarasty Almaty aýdandyq ishki ister basqarmasynyń Tergeý bólimi mamyrdyń 4-i kúni Qylmystyq kodekstiń 102-shi babynyń 1-shi tarmaǵy boıynsha, óz-ózine qol jumsaýǵa májbúrledi degen aıyppen qylmystyq is qozǵady» dep atap kórsetti.
Onyń aıtýynsha atalmysh fakti boıynsha qazir izdestirý, tekserý jumystary júrgizilýde. Sondaı-aq birneshe qosymsha saraptaý jumystary taǵaıyndalǵan.
