Óz-ózin atyp óltirgen Jampozovtyń isine qatysty sot úkimi ózgerissiz qaldy
KÓKShETAÝ.QazAqparat - Aqmola oblysynda Ómirbek Jampozovtyń isine qatysty shyǵarylǵan sot sheshimi ózgerissiz qaldyryldy, dep habarlaıdy QazAqparat tilshisi.
Aqmola oblystyq sotynyń baspasóz qyzmetinen málim etkendeı, keshe oblystyq sottyń qylmystyq ister jónindegi apellıatsııalyq sot alqasy óz-ózine qol jumsaǵan Ómirbek Jampozovtyń isine qatysty sot úkimine sottalýshylardyń jáne olardyń qorǵaýshylarynyń aryzyn qarady.
«Aqmola oblystyq sotynyń qylmystyq ister jónindegi apellıatsııalyq sot alqasy sottalýshylarǵa qatysty Tselınograd aýdandyq sotynyń sheshimin ózgerissiz qaldyrdy», - dep túsindirdi Aqmola oblystyq sotynyń baspasóz hatshysy Kúlásh Domalaqova.
Eske sala keteıik, «Qazvodhoz» kommýnaldyq kásipornynyń burynǵy basshysy Ómirbek Jampozov aǵymdaǵy jyly sybaılastarymen birge Tselınograd aýdanynyń Preobrajenskoe sý torabyn jóndeý jumystaryna bólingen 640 mıllıon teńgeni jymqyrdy dep aıyptalǵan bolatyn. ıAǵnı, osy qylmystyq istegi alty kúdiktiniń biri edi. Keıin, ózin kináli emestigin dáleldemek bolǵan ol, 20 shildede osy is tergelip jatqan Tselınograd aýdandyq prokýratýrasynyń ǵımaratynda quqyq qorǵaý organdary qyzmetkerlerine oq atty. Artynsha óz-ózin atyp óltirdi.
Alaıda, Ómirbek Jampozovke qatysty is onyń ólimine baılanysty toqtatylmaı, Tselınograd aýdandyq soty ony kináli dep tapty. Biraq qaıtys bolýyna baılanysty qylmystyq jaýapkershilikten bosatyldy. Al qalǵan kúdiktilerge 2 jyl 6 aıdan 7 jylǵa deıin bas erkinen aıyrý jáne dúnıe-múlkin tárkileý jazasy taǵaıyndaldy.
