Óz mindetin oryndamaıtyn ata-analar kóbeıip keledi – Komıtet

ASTANA. KAZINFORM – Qazaqstanda ata-analyq mindetterdi tıisinshe oryndamaýǵa baılanysty ákimshilik quqyqbuzýshylyqtar artyp keledi. Sońǵy 5 jylda mundaı jaǵdaılar 3,5 ese kóbeıgen. Bul týraly QR Oqý-aǵartý mınıstrligi Balalardyń quqyqtaryn qorǵaý komıtetiniń tóraǵasy Nasymjan Ospanova aıtyp berdi.

Ata-analyq mindetti tıisinshe oryndamaýǵa baılanysty ákimshilik quqyqbuzýshylyq boıynsha 2020 jyly 5 myń jaǵdaı tirkelse, 2024 jyly bul kórsetkish 19 myńǵa deıin jetken. Sondaı-aq 5 jylda kámeletke tolmaǵandardyń túngi ýaqytta eresekterdiń qaraýynsyz úıden tys jerde júretin quqyqbuzýshylyqtar 2 ese – 2020 jylǵy 65 myń jaǵdaıdan 2024 jyly 112 myń jaǵdaıǵa deıin kóbeıgen.

− Balalardyń túngi ýaqytta oıyn-saýyq oryndarynda bolý faktileri de 844 jaǵdaıdan 2406 jaǵdaıǵa deıin 3 esege jýyq kóbeıgen. Bul málimetter erekshe nazar aýdarýdy talap etedi. Kún jylynǵanda terezeden qulaý, sýǵa batý jáne balalarǵa qatysty basqa da oqys oqıǵalar kóbeıedi. Taldaý kórsetkendeı, terezeden qulaýdyń shamamen 80%-ynda 2-5 jas aralyǵyndaǵy balalar zardap shegedi. Sýǵa batý jaǵdaılarynyń da 90%-ynda balalar eresekterdiń tıisti baqylaýynsyz sý jaǵasynda júrgen. Sondaı-aq, balalar turmystyq jaraqat alý, jol-kólik oqıǵalary men órt saldarynan da qurban bolyp otyr, − dedi N.Ospanova Ortalyq kommýnıkatsııalar qyzmetinde ótken baspasóz máslıhatynda.

Aıta keteıik, 2025 jyldyń 1 qyrkúıeginen bastap, «DOSBOLLiKe» býllıngke qarsy jobasy elimizdiń barlyq mektepteri men kolledjderine engiziledi.

Sondaı-aq, elimizdiń barlyq óńirinde balalar men ata-analarǵa kásibı kómek kórsetetin Psıhologııalyq qoldaý ortalyqtary ashyldy. Onda shamamen 250 myń adam kómek aldy.