Óz qyzyn zorlaǵan aqtóbelik sottaldy
AQTÓBE. QazAqparat – Aqtóbede týǵan qyzyn zorlady dep kúdikke iligip, uzaq ýaqyt izdeýde júrgen áke ustalyp, sottaldy, dep habarlaıdy QazAqparat tilshisi.
Oǵan 2019 jyldyń 27 aqpany kúni Aqtóbe qalasyndaǵy Qarǵaly aýyly, Beıbitshilik kóshesindegi páterinde kámelet jasqa tolmaǵan qyzyn zorlady degen aıyp taǵyldy.
«Aqtóbe oblysy boıynsha qylmystyq ister jónindegi mamandandyrylǵan aýdanaralyq sotynyń 2020 jyldyń 6 aqpanyndaǵy úkimimen E.Ahmetov QR QK-niń 124-babynyń 3-bóligi, 120-babynyń 4-bóligi boıynsha kináli dep tanylyp, oǵan qylmystyq quqyqbuzýshylyqtar jıyntyǵymen túpkilikti óteýge 19 jyl bas bostandyǵynan aıyrý jazasy taǵaıyndaldy. Jazany óteý orny qylmystyq-atqarý júıesiniń qaýipsizdigi barynsha joǵary mekemesinde óteý belgilendi.
Jábirlenýshiniń zańdy ókiliniń moraldyq zalaldy óteý týraly azamattyq talaby tolyq kólemde qanaǵattandyrylyp, sottalǵannan 5 000 000 teńge óndirildi.
Atalǵan qylmystyq is alqabılerdiń qatysýymen qaraldy. Úkim zańdy kúshine engen joq», - dep habarlady Aqtóbe oblystyq sotynyń baspasóz qyzmeti.
Eske salsaq, Aqtóbe oblystyq polıtsııa departamenti ótken jyly asa aýyr qylmys jasady degen kúdikke ilikken Ermek Ahmetovke halyqaralyq izdeý jarııalady.
