Óz qaýipsizdigimiz úshin Aýǵanstanǵa kómektesý qajet - Dáýren Abaev

NUR-SULTAN. QazAqparat - Aqparat jáne qoǵamdyq damý mınıstri Dáýren Abaev «Habar» arnasyndaǵy «Ashyq dıalog» baǵdarlamasynda Qazaqstannyń Aýǵanstanǵa ne úshin kómektesetinin túsindirdi, dep habarlaıdy QazAqparat tilshisi.

«Aýǵanstanǵa jalǵyz Qazaqstan ǵana kómektespeıdi. Bul eldiń máselesine búkil álemdik qaýymdastyq alańdap otyr. Óıtkeni, bul elge qalypty ómir qaıtarylmasa, barlyq elde ekstremızm, esirtki tasymaly, radıkalızm qaýpi týyndaýy múmkin», - dedi ol.

Onyń aıtýynsha, turaqsyzdyq jaılaǵan Aýǵanstanmen kórshilikti beı-jaı qaldyrýǵa bolmaıdy.

«Alystaǵy Argentına Kabýldaǵy jaǵdaıǵa bas aýyrtpaı otyra alady, al bizdiń elimiz ben Aýǵanstannyń arasy myń shaqyrym ǵana. Qazir Qazaqstan JOO-larynda aýǵan jastary bilim alyp júr. Olar otanyna oralyp, memlekettik apparatta, mektepter men aýrýhanalarda jumys isteıdi. Árkim óz salasynda memleketti jaqsartýǵa tyrysady. Olar da terrorıstik uıymdardyń birine qosylyp ketýi múmkin edi ǵoı. Eger lańkester lagerinde daıyndyqtan ótken iritki salýshylar bizdiń shekaramyzǵa jaqyndasa, mıllıondaǵan aqsha emes, azamattarymyzdyń ómiri qıylady. Osyǵan jol bermeýimiz kerek», - dedi Dáýren Abaev.