Óz elinde alıment tóleýden qashyp júrgen sheteldik Atyraýda ustaldy

Atyraýda óz elinde alıment tóleýden jaltaryp, halyqaralyq izdeýde bolǵan sheteldik ustaldy. Ol qoǵamdyq orynda mas bolyp júrgen, habarlaıdy QazAqparat tilshisi.

Atyraý oblystyq polıtsııa departamentiniń baspasóz qyzmetinen málim etkendeı, 2 qazannan beri «Zańsyz kelýshi – 2023» is-sharasy ótip jatyr.

– Atalǵan is-sharanyń alǵashqy kúninde kóshi-qon zańnamasyn buzǵan 200-ge jýyq shetel azamaty anyqtaldy. Onyń ishinde 151 sheteldik Ákimshilik quqyq buzý týraly kodekstiń 517-babynyń 3,4,5,6 jáne 7-bólimin buzǵany úshin jaýapqa tartyldy. Atalǵan qujattyń 518-babymen 46 sheteldik jazalandy. Quqyq buzǵan 6 sheteldik azamattyq is júrgizý jáne ákimshilik tártibimen el aýmaǵynan shyǵaryldy. Al, jeke basyn anyqtaıtyn qujattardyń bolmaýyna baılanysty Ózbekstan Respýblıkasynyń 16 azamaty qabyldaý-taratý ornyna ornalastyryldy, – dep habarlady departamenttiń baspasóz qyzmeti.

Sheteldiktiń biri – 1984 jylǵy azamattyń óz elinde alıment tóleýden jaltarǵany anyqtaldy. Ol 2 qazanda túngi mezgilde qoǵamdyq orynda mas kúıinde júrgen.

– Patrýldik polıtsııa batalonynyń qyzmetkerleri sheteldiktiń jeke basyn kýálandyratyn qujatyn tekserdi. Sol kezde onyń Ózbekstan Respýblıkasynda alıment tóleýden jaltarǵany úshin halyqaralyq izdeý jarııalanǵany anyqtaldy, – dep málim etti departamenttiń baspasóz qyzmetinen.

Eske sala ketelik, budan buryn Atyraýda ruqsatsyz jumys istegen 19 sheteldikke 86 myń teńgeden aıyppul salynǵanyn habarlaǵan edik.