Óz betimen aǵylshyn tilin meńgergen mańǵystaýlyq oqýshy «New York» ýnıversıtetiniń grantyn jeńip aldy
Abý-Dabıdegi New York ýnıversıtetine álem boıynsha aǵylshyn tilin jetik biletin stýdentterdiń 4 paıyzy ǵana oqýǵa joldama alady eken. Bıyl 100 myńnan astam oqýshy qujat tapsyrǵan bolsa, sonyń 500-i oqýǵa qabyldanǵan. Solardyń biri – Tuşyqudyq aýylynyń týmasy Darıǵa Bolatbaı.
«TMD boıynsha eń tanymal oqý oryndarynyń biri sanalatyn ýnıversıtet týraly 10-synyp oqyp júrgende estidim. Abý-Dabıdegi «New York» ýnıversıteti AQSh-taǵy «New York» zertteý ýnıversıtetiniń bir bólimi eken. Shynymdy aıtsam, shet memleketke oqýǵa túsemin dep múldem oılamadym. Degenmen baǵymdy synap kórdim. Mundaǵy eń basty talap esse jazý. Biri ómirbaıanyńdy, endi ekinshisi «Sen nege osy ýnıersıtetti tandaısyń?» degen taqyrypta boldy. Sol esse meniń grantqa túsýime kóp áser etti. Karantın ýaqytyndaǵy qıyndyqqa qaramastan onlaın tildesý suhbatynan da sátti óttim. Birneshe kúnnen keıin oqýǵa shaqyrtý keldi», - dedi Darıǵa Bolatbaı.
Darıǵa Bolatbaı alǵashynda Tuşyqudyq aýylyndaǵy S.Jańǵabylov mektebinde oqyǵan. Keıin Aqtaýdaǵy Nazarbaev zııatkerlik bilim ordasyna túsip, bıyl 12 synypty úzdik aıaqtady. Orys, aǵylshyn tilderin tereń meńgere otyryp, mekteptiń qoǵamdyq jumystarynda belsendilik tanytqan.
«7 synypta Nazarbaev zııatkerlik mektebine oqýǵa tústim. Bastapqyda orys, aǵylshyn tilin múldem bilmedim. Aǵylshyn tilin meńgertetin kýrstarǵa qatyspaı-aq óz betimshe úırenýge bel býdym. Mektep ómirine belsendi aralasyp, ǵylymı jobalarǵa qatysa bastadym. Ár oblysta ótetin bilim saıystaryna baryp, Frantsııadaǵy halyqaralyq ǵylymı jobaǵa joldama aldym. Bilimniń tasyn qalaǵan Tuşyqudyq aýylymdaǵy S.Jańǵabylov mektebi bolsa, Nazarbaev mektebi armanyńa qol jetkizý óz qolyńda ekenin úıretti»,-dedi Darıǵa Bolatbaı.
Darıǵa Bolatbaı birneshe ret oblystyq, respýblıkalyq bilim báıgelerinde júldeger atanǵan. «Janyńda júr jaqsy adam» atty áleýmettik jobany júzege asyrǵan. Elbasy medaliniń qola, respýblıkalyq olımpıadanyń kúmis júldegeri. Al bıyl «Jyl oqýshysy-2021» atalymy Darıǵa Bolatbaıǵa buıyrdy. Ol bolashaqta bilikti dáriger atanyp, qazaq eliniń medıtsına salasyna tyń jańalyq ákelýdi armandaıdy.