Óz balasyn uryp, basyn jardy degen almatylyqtyń isi qaıta tergeýge jiberildi
ALMATY. QazAqparat - Almatyda tal túbinen basy jarylǵan kúıinshe tabylǵan balanyń isin sýdıa qaıta tergeýge jiberdi, dep habarlaıdy QazAqparat tilshisi.
«Qylmystyq is materıaldarymen tanysa kele tergeý jumystarynyń qylmystyq protsessýaldy buzý tártibi anyqtaldy. Bul olqylyqtardy sot qalpyna keltire almaıdy. Osyǵan baılanysty sot isti prokýrorǵa qaıta qaraýǵa baǵyttaıdy», - dedi sýdıa Erkin Maıshınov.
Sonymen qatar, aıyptalýshy Murat Asqaroǵlynyń qorǵaýshysy Nurlan Óstemirov «adam óltirýge umtyldy» degen aıyppen kelispeıtinin aıtty. Ol 4 jastaǵy balanyń psıhologqa bergen jaýabynda jol apaty bolý yqtımaldyǵy joǵary ekendigin aıtty.
«Ol óziniń súıikti balasyn basynan ura ala ma? Bul - nonsens. Men sottan bul ispen naqtyraq tanysý úshin ýaqyt berýin suradym. Qorǵaýymdaǵy adam óziniń aldyńǵy bergen túsiniktemesinen bas tartty. Ony májbúrlegeni baıqalyp tur: psıhologııalyq ta, fızıkalyq ta májbúrleý bolǵan. Balamen psıhologtyń qatysýymen sóıleskende bala «qara djıp basyp ketti» dep aıtqan. Kókireginde de iz bar. Dene jaraqattary jol apatyna keledi», - dedi sottalýshynyń advokaty Nurlan Óstemirov.
Odan bólek, qorǵaýshy sottalýshynyń psıhdıspanserde esepte turmaıtynyn aıtyp, alkogoldi ishimdik ishpeıdi degen dáıek keltirdi.
Aıta ketý kerek, búgin tal túbinen basy jarylǵan kúıinshe tabylǵan 4,5 jasar balanyń ákesi Murat Asqaroǵlynyń isi boıynsha aldyn ala sot tyńdalymy ótken edi. Sottalýshy Murat Asqaroǵly BAQ ókilderine óziniń kináli emestigin aıtyp, ar-ojdanyna nuqsan keltirmeýdi ótindi.
Eske sala keteıik, qaıǵyly oqıǵa 16 shilde kúni Odesskaıa men Brıanskaıa kóshesiniń qıylysynda oryn alǵan bolatyn. Turǵyndar tal túbinen 4 jasar balany taýyp alǵan. Bala shala-jansar kúıinde shuǵyl aýrýhanaǵa jetkizilip, ota jasaldy. Almaty polıtsııasy jantúrshigerlik oqıǵaǵa kúdikti retinde balanyń ákesin ustady. Murat Asqaroǵly óz kinásin moıyndap, qazaqstandyqtardan keshirim surady. Er adam mastyqtan eseńgirep turǵanda balasynyń qyńqyl-syńqylyn kótere almaı, taspen samaıynan bir-aq urǵan.
Qalalyq mamandandyrylǵan qylmystyq sot Murat Asqaroǵlyn QR QK 24-babynyń 3-bólimimen, 99-babynyń 2-bólimimen qamaýǵa alǵan bolatyn.
